দক্ষিণ কামৰূপ, 9 নৱেম্বৰঃ পুনৰ আন এক বিধ্বংসী ঘূৰ্ণীবতাহে অশান্ত কৰি তুলিছে বংগোপসাগৰ ৷ বতৰ বিজ্ঞানীসকলে নামাকৰণ কৰা এই ঘূৰ্ণীবতাহজাকৰ নাম হ’ল ‘বুলবুল’ ৷ যাৰ প্ৰভাৱ পৰাৰ সম্ভাৱনা আছে অসমতো ৷ এই ঘূৰ্ণীবতাহজাকৰ ফলতেই আজিৰে পাৰ 12 নৱেম্বৰলৈ উত্তৰ-পূৱতো কম বেছি পৰিমাণে বৰষুণ হোৱাৰ সম্ভাৱনা আছে ৷ লগতে এই সময়ছোৱাত ডাৱৰীয়া হৈ থাকিব অসমৰ আকাশ ৷
আনহাতে, 10 নৱেম্বৰৰ পৰা উত্তৰ-পূৱৰ সাতোখন ৰাজ্যতে বৰষুণৰ সম্ভাৱনা ব্যক্ত কৰিছে বৰঝাৰস্থিত আঞ্চলিক বতৰ বিজ্ঞান কেন্দ্ৰই ৷ উল্লেখ্য যে, বংগোপ সাগৰত সৃষ্টি হোৱা এই ঘূৰ্ণীবতাহৰ গতিবেগ প্ৰতিঘণ্টাত 9 কিলোমিটাৰ বৃদ্ধি পাই আছে আৰু বৰ্তমান ইয়াৰ গতি হৈছে ঘন্টাত 140 কিলোমিটাৰ ৷ অৱশ্যে মাটিলৈ প্ৰৱেশ ঘটাৰ লগে লগে হ্ৰাস পাব ইয়াৰ গতি ৷ বুলবুলে অসমত কোনে বিশেষ প্ৰভাৱ নপেলায় বুলি জানিবলৈ দিছে বতৰ বিজ্ঞানীয়ে ৷ পশ্চিম বংগ হৈ বাংলাদেশলৈ প্ৰৱেশ কৰিব বুলবুলে ৷
