আজাৰা, 18 ছেপ্তেম্বৰ: বৰগীত, বাঁহীৰ সুমধুৰ সুৰেৰে জীপাল এটা COVID কেয়াৰ কেন্দ্ৰ ৷ পৰিস্কাৰ-পৰিচ্ছন্নতাৰেও ভৰা কেন্দ্ৰটো ৷ COVID কেয়াৰ কেন্দ্ৰ নহয় যেন ৰোগী সকলৰ নিজা ঘৰহে ৷ দক্ষিণ কামৰূপৰ মিৰ্জাৰ সৰপাৰাত অৱস্থিত COVID কেয়াৰ কেন্দ্ৰটো পুৱা-গধুলি মুখৰিত হৈ থাকে ৰোগীয়ে পৰিৱেশন কৰা ঘোষা-বৰগীতৰ পদেৰে ৷ ইয়াৰোপৰি কোনো ৰোগীয়ে যদি বিহুগীত আৰু কোনোৱে আকৌ বাঁহীৰ সুললিত ধ্বনিৰে জীপাল কৰি ৰাখে কেন্দ্ৰটোৰ প্ৰতিটো পুৱা-সন্ধ্যা ৷ শেহতীয়াকৈ কেন্দ্ৰটোৰ সকলো লোকেই মিলি পালন কৰে বিশ্বকৰ্মা পূজাও ৷
উল্লেখ্য যে কৰ'ণাত আক্ৰান্ত হোৱাৰ পাচত বহু ৰোগী মানসিকভাৱে ভাগি পৰে যদিও, মিৰ্জাস্থিত COVID কেয়াৰ কেন্দ্ৰ থকা কোনো এগৰাকীও লোকৰ মুখত নাই হতাশাৰ চাপ ৷ এনে ক্ষেত্ৰত কৰ'ণা আক্ৰান্ত ৰোগীক মানসিকভাৱে সুস্থ কৰি ৰখাৰ প্ৰয়াস কৰিছে COVID কেয়াৰ কেন্দ্ৰ কৰ্তৃপক্ষইয়ো ৷ দিনে-নিশাই ৰোগীক সেৱা আগবঢ়ায় আহিছে কৰ্তব্যৰত চিকিৎসাকৰ্মী সকলে ৷ আনহাতে কেন্দ্ৰটো পৰিচালনাৰ দায়িত্বত থকা ডঃ জ্যোতি কুমাৰ দাস আৰু নডেল বিষয়া নেকিব আহমেদৰ তত্বাৱধানত স্বাস্থ্যকৰ্মীসকলে সুচাৰুৰূপে পালন কৰি গৈছে নিজৰ কৰ্তব্য ৷
যোৱা ২৯ আগষ্টৰ পৰা আৰম্ভ হোৱা মিৰ্জাৰ সৰপাৰাস্থিত COVID কেয়াৰ কেন্দ্ৰটোত বৰ্তমানলৈ ১০৩৫ গৰাকী ৰোগী ভৰ্তি হোৱাৰ সমান্তৰালকৈ ৫৫৫ গৰাকী ৰোগী সুস্থ হৈ উঠিছে । লগতে স্বাস্থ্যৰ অৱনতি ঘটা ৩৭ গৰাকী ৰোগীক উন্নত চিকিৎসাৰ বাবে গুৱাহাটী চিকিৎসা মহাবিদ্যালয়ৰ চিকিৎসালয়ত প্ৰেৰণ কৰা হয় । বৰ্তমানেও কেন্দ্ৰটোত ৪৪৩ গৰাকী ৰোগীৰ চিকিৎসা অব্যাহত আছে ।
লগতে পঢ়ক: ভাৰতত কৰ'ণা আক্ৰান্তৰ সংখ্য়াই অতিক্ৰম কৰিলে 52 লক্ষাধিক
