ৰঙিয়া,18 জুনঃ দেশৰ প্ৰায় সকলো জনসাধাৰণকেই অৰ্থনৈতিক ভাৱে বা বিভিন্ন ধৰণে প্ৰভাৱিত কৰিলে দেশজুৰি বলবৎ হোৱা লক ডাউনে ৷ লক ডাউনৰ পাছত "আনলক 1" আৰম্ভ হোৱাৰ লগে লগে স্বাভাৱিক জীৱন ঘুৰাই পাইছে দেশৰ জনসাধাৰণে ৷ সুস্থিৰ হৈছে বহুসংখ্যক ক্ষুদ্ৰ তথা মজলীয়া উদ্যোগী তথা ব্যৱসায়ী সকলৰ ব্যৱসায় ৷ কিন্ত বৰ্তমানেও সুস্থিৰ হোৱা নাই বহু সংখ্যক ক্ষুদ্ৰ ব্যৱসায়ীৰ জীৱন প্ৰণালী,লাভ কৰা নাই ন্যূনতম অৰ্থনৈতিক সকাহ ৷
বিগত 8 জুনৰ পৰা দেশত "আনলক 1" আৰম্ভ হোৱাৰ লগে লগে দেশৰ ধৰ্মীয় উপাসনাস্থলী সমূহ দৰ্শনাৰ্থীৰ বাবে মুকলি কৰি দিয়া হৈছে যদিও আগৰ দৰে মঠ-মন্দিৰ সমূহত দেখা পোৱা নাই দৰ্শনাৰ্থীৰ ভিৰ ৷ পূজাৰ কাম-কাজ চলাই নিবলৈ মঠ-মন্দিৰ সমূহত দৰ্শনাৰ্থীৰ অভাৱ ৷ ইতিমধ্যে,লক-ডাউনে জুৰুলা কৰি থোৱা পূজাৰী সকলৰ লগতে ফুল-ফল তথা পূজাৰ সামগ্ৰী বিক্ৰী কৰা লোকসকলে বৰ্তমানেও কোনো সকাহ লাভ কৰা নাই ৷ দৰ্শনাৰ্থীৰ অভাৱৰ বাবে দৰ্শনাৰ্থীক সম্বল কৰিয়ে চলি থকা এই সকলৰ লোকৰ পানীত হাঁহ নচৰা যেন অৱস্থা হৈছে ৷ অনুৰূপ অৱস্থা ৰঙিয়াস্থিত মন্দিৰ সমূহৰ পূজাৰী তথা মন্দিৰৰ সামগ্ৰী বিক্ৰেতা সকলৰ ৷ ইয়াৰ উপৰিও বহাগৰ বিহুৰ লগতে বিবাহ আৰু অন্যান্য অনুষ্ঠান সমুহ বন্ধ হৈ পৰাৰ বাবে ভীষণ লোকচানৰ সন্মুখীন হৈছে ফুলৰ ব্যৱসায় কৰা লোকসকল ৷ চলিত বছৰত তেঁলোকৰ ব্যৱসায়ে যে পূৰ্বৰ অৱস্থা ঘূৰাই পাব তাৰো কোনো নিশ্চয়তা নাই ৷ মহামাৰী ক’ৰণাই আতংকিত কৰি ৰখাৰ সময়তেই এই সকল লোকৰ আৰ্থিক দুৰৱস্থাই চিন্তিত কৰি তুলিছে সচেতন লোকসকলকো ৷
লগতে পঢ়কঃ বৰহোলাৰ জয়ন্ত বৰাৰ মৃত্যুক পৰিকল্পিত হত্যা আখ্যা বিধায়ক ৰূপজ্যোতি কুৰ্মীৰ
