কামৰূপ, 10 অক্টোবৰঃ দেশত সঘনাই বৃদ্ধি পাইছে লাভ জেহাদৰ ঘটনা ৷ এইবাৰ অসমৰ যুৱকৰ প্ৰৱঞ্চনাৰ বলি হ’ল এগৰাকী বহিঃৰাজ্যৰ যুৱতী ৷ প্ৰেমৰ জালত ফুচুলাই মহাৰাষ্ট্ৰৰ ৱাটমল জিলাৰ বনজাৰি চহৰৰ পৰা লৈ অনাৰ অভিযোগ বৰপেটাৰ যুৱকজনৰ ওপৰত ৷
বৰপেটাৰ চাদ্দাম চিদ্দিক নামৰ যুৱকজন কৰ্মসূত্ৰে কৰ্ণাটকত এটি কোম্পানীত কৰ্মৰত আছিল ৷ আনহাতে সেই একেটা কোম্পানীতে কৰ্মৰত আছিল মহাৰাষ্ট্ৰৰ যুৱতীগৰাকী ৷ তাৰ পিছতেই দুয়োৰে মাজত গঢ়ি উঠিছিল প্ৰেমৰ সম্পৰ্ক ৷ অভিযোগ মতে, নিজকে চাদ্দাম দাস নামে পৰিচয় দি প্ৰেমৰ জালত পেলাইছিল যুৱতীগৰাকীক ।
অভিযোগ মতে, অসমত চাদ্দাম নামটো হিন্দুৱেও ব্যৱহাৰ কৰে বুলি কৈ স্বয়ং নিজকে হিন্দু বুলি পৰিচয় দি যুৱতীগৰাকীক ফোচলাই অসমলৈ লৈ আনিছিল চাদ্দামে ৷ অসমলৈ আনি হিন্দুৰ পৰা ইছলাম ধৰ্মলৈ সলনি কৰাইছিল যুৱতীগৰাকীক ৷ আনকি কোনো লোকৰ লগত সম্পৰ্ক নাৰাখিবলৈ ভাঙি পেলোৱা হৈছিল যুৱতীগৰাকীৰ ম’বাইলৰ চিম কাৰ্ড । কিন্তু যুৱতীগৰাকীৰ দেউতাকৰ ফোন নম্বৰ মনত থকাৰ বাবেই সুবিধা বুজি সকলো ঘটনা জনোৱাত পোহৰলৈ আহিছে এই সমগ্ৰ ঘটনা ৷
পিচত এই ঘটনা সন্দৰ্ভত হিন্দু জাগৰণ মঞ্চই জ্ঞাত হোৱাত বুধবাৰে নিশা বৰপেটাৰ আৰক্ষী আৰু প্ৰশাসনৰ সহযোগত যুৱতীগৰাকীক উদ্ধাৰ কৰা লগতে যুৱতীগৰাকীৰ দেউতাক আৰু খুড়াকৰ হাতত যুৱতীগৰাকীক গটাই দি বিমানযোগে মহাৰাষ্ট্ৰলৈ পঠিয়াই দিয়ে । বৰ্তমান বৰপেটা আৰক্ষীৰ জিম্মাত আছে চাদ্দাম চিদ্দিক নামৰ যুৱকজন ।
