বকো, ১৫ মে‘: কামৰূপ জিলাৰ ছয়গাঁও ঔদ্যোগিক বিকাশ কেন্দ্ৰত শুকুৰবাৰে সংঘটিত হয় এক অঘটন । বিকাশ কেন্দ্ৰটোত থকা মেচাৰ্চ কৃষ্ণা ফুড প্ৰডাক্টচত কৰ্মৰত এজন শ্ৰমিকৰ অস্বাভাৱিক মৃত্যুক কেন্দ্ৰ কৰি সৃষ্টি হয় চাঞ্চল্যৰ । কোম্পানীটোৰ অইন শ্ৰমিকে জানিবলৈ দিয়া মতে, শুকুৰবাৰে পুৱা প্ৰায় ৬ বজাত শুই থকা অৱস্থাত উশাহ নিশাহত কষ্ট পোৱা দেখি কোম্পানীৰ শ্ৰমিকসকলে কোম্পানীৰ ৰান্ধনী হিচাপে কৰ্মৰত ৩০ বছৰীয়া জিউ নাথ ৰাৱতক ততাতৈয়াকৈ বকোৰ বামুণীগাঁওস্থিত মহাত্মা গান্ধী আদৰ্শ চিকিৎসালয়ত ভৰ্ত্তি কৰায় ৷ কিন্তু চিকিৎসকে লোকজনক মৃত বুলি ঘোষণা কৰে । জানিব পৰা মতে, জিউ নাথ ৰাৱত চুবুৰীয়া ৰাষ্ট্ৰ নেপালৰ মাহোত্তৰী জিলাৰ আৰু বহু দিন ধৰি মেচাৰ্চ কৃষ্ণা ফুড প্ৰডাক্টচত কৰ্মৰত হৈ আছিল ।
ঘটনাটোক কেন্দ্ৰ কৰি ইতিমধ্যে জামবাৰী পহৰা চকীৰ আৰক্ষী উপস্থিত হৈ মৃত্যুৰ কাৰণ জানিবলৈ কোভিড ১৯ টেষ্ট তথা মৰণোত্তৰ পৰীক্ষাৰ বাবে মৃতদেহটো গুৱাহাটী মেডিকেল কলেজ হস্পিতাল লৈ প্ৰেৰণ কৰিছে ।
লগতে পঢ়ক : তেজপুৰৰ হলেশ্বৰ পঞ্চায়তত চৰকাৰী আচঁনিত ব্যাপক দুৰ্নীতিৰ অভিযোগ
