কামৰূপ, 7 ডিচেম্বৰ: কামৰূপ আৰক্ষীৰ জালত পাঁচ বেংক হেকাৰ ৷ দীৰ্ঘদিনৰ পৰা বেংক হেকিঙৰ জৰিয়তে ৰঙিয়াত তোলপাৰ লগাইছিল এটা বেংক হেকাৰৰ দলে ৷ কিছুদিনৰ পূৰ্বে তিনিজনকৈ ব্যক্তিৰ বেংক একাউন্টৰ পৰা বৃহৎ পৰিমাণৰ ধন হৰলুকি হোৱাৰ পাছতে ৰঙিয়া থানাত ৰুজু কৰা হৈছিল গোচৰ ৷ তাৰ পাছতে কামৰূপ আৰক্ষীয়ে আৰম্ভ কৰিছিল তদন্ত ৷ দেওবাৰে নিশা ৰঙিয়া আৰক্ষীয়ে নগাঁৱৰ পৰা বেংক হেকিঙৰ লগত জৰিত পাঁচজন ব্যক্তিক গ্ৰপ্তাৰ কৰিবলৈ সক্ষম হয় ৷
উল্লেখ্য যে, বেংক হেকিঙৰ লগত জড়িত ব্যক্তি কেইজনৰ নাম ছৈয়দ আহমেদ লস্কৰ, ফইজ আহমেদ লস্কৰ, তৈমুস আলী লস্কৰ, গুলজাৰ আহমেদ লস্কৰ আৰু ৰছিদ আহমেদ ৷ আটাইকেইজনৰ পৰা আৰক্ষীয়ে মোবাইল ফোন, লেপটপ, প্ৰিণ্টাৰ, স্পাই কেমেৰাসহ বহুকেইখন ভুৱা ভোটাৰ আইডি, ৰবৰ ষ্টাম্প, ডুব্লিকেট এটিএম কাৰ্ড আৰু নগদ পঞ্চশ হাজাৰ টকা জব্দ কৰে ৷ ধৃত ব্যক্তিকেইজনক জেৰা অব্যাহত ৰাখিছে আৰক্ষীয়ে ৷
