ছয়গাঁও, 20 চেপ্তেম্বৰঃ ছয়গাঁৱৰ প্ৰাথমিক স্বাস্থ্য কেন্দ্ৰত চৰম অৰাজকতাৰ অভিযোগ ৷ মহকুমা স্বাস্থ্য বিষয়া আৰু চিকিৎসক-কৰ্মচাৰীৰ অনিয়মীয়া উপস্থিতিত অতিষ্ঠ ৰাইজ ৷ শুকুৰবাৰে একাংশ সাংবাদিকে স্বাস্থ্য কেন্দ্ৰটোত চলোৱা এক অভিযানত উন্মোচিত হয় কেতবোৰ অনিয়মৰ লগতে চিকিৎসালয় খনত চলি থকা চৰম অৰাজকতাৰ তথ্য ৷
উল্লেখযোগ্য যে ছয়গাঁৱৰ গোৱৰ্ধনত অৱস্থিত ছয়গাঁও প্ৰাথমিক স্বাস্থ্য কেন্দ্ৰ আৰু গ্ৰাম্য চিকিৎসালয়খনৰ পৰিচালনাৰ ক্ষেত্ৰত মহকুমা স্বাস্থ্য বিষয়া ডাঃ ৰাধাচৰণ দাসে গাফিলতি কৰাৰ অভিযোগ উত্থাপিত হৈছে ৷ ইয়াৰ লগতে চিকিৎসক কৰ্মচাৰীৰ বিৰুদ্ধেও চৰম অনিয়ম তথা পলমকৈ স্বাস্থ্য কেন্দ্ৰত উপস্থিত হোৱাৰ অভিযোগ স্থানীয় ৰাইজৰ ৷ ৰাজহুৱা অভিযোগৰ ভিত্তিতে ছয়গাঁৱৰ সাংবাদিকৰ এটি দল শুকুৰবাৰে পুৱা 8.30 বজাত উপস্থিত হৈছিল স্বাস্থ্য কেন্দ্ৰটোত ৷ চৰকাৰী নিয়ম মতে 8.30 বজাত চিকিৎসক আৰু আন আন কৰ্মচাৰী চিকিৎসালয়ত উপস্থিত থাকিব লাগে যদিও 9 বজাৰ পিচত উপস্থিত হয় এগৰাকী চিকিৎসা কৰ্মীৰ লগতে ফাৰ্মাচিষ্ট গৰাকী ৷
আনহাতে 9.45 মিনিটত দুগৰাকী চিকিৎসক উপস্থিত হোৱাৰ বিপৰীতে 9.45 মিনিটতহে চিকিৎসালয়ত আহি উপস্থিত হয় স্বাস্থ্য বিষয়া ডাঃ ৰাধাচৰণ দাস ৷ কিন্তু তাৰ পাচতো উপস্থিত হোৱা দেখা নগ'ল আন দুগৰাকী চিকিৎসক ৷ ইয়াৰ যথেষ্ট সমস্যাৰ সন্মুখীন হৈ আহিছে স্থানীয় লোকসকল ৷ সাংবাদিকে সোধা প্ৰশ্নৰ উত্তৰত চালে বেৰে কোবোৱা উত্তৰ দি নিজৰ ব্যৰ্থতা ঢকাৰ চেষ্টা চলাই চিকিৎসা বিষয়াগৰাকীয়ে ৷
উল্লেখ্য যে, যি সময়ত স্বাস্থ্যমন্ত্ৰীয়ে ৰাজ্যত উন্নয়নৰ ঢাক-ঢোল বজাই বক্তৃতাৰ ফুলজাৰি দি ফুৰিছে, সেই সময়তে ৰাজধানী চহৰৰ নাতিদূৰৈত অৱস্থিত চৰকাৰী স্বাস্থ্য কেন্দ্ৰটোৰ এই অৱস্থাই উদঙাই দিছে স্বাস্থ্যখণ্ডৰ উন্নয়নৰ ফোপোলা স্বৰূপ ৷ প্ৰশ্ন হয়, এনেবোৰ অনিয়ম পোহৰলৈ অহাৰ পিচত স্বাস্থ্য মন্ত্ৰীগৰাকীয়ে উপযুক্ত ব্যৱস্থা গ্ৰহণ কৰিব নে ? নে একে ধৰণেই চলি থাকিবলৈ দিব স্বাস্থ্যকেন্দ্ৰটো ৷
