বাইহাটা চাৰিআলিত কম্পিউটাৰৰ উজান!

বাইহাটা চাৰিআলি আৰক্ষী থানাত যিফালে চাই সেইফালেই মাথো কম্পিউটাৰ আৰু কম্পিউটাৰ । কম্পিউটাৰৰ লগতে ইনভাৰ্টাৰ, প্ৰিন্টাৰৰো দম আৰক্ষী থানাখনত । কিন্তু কিয়?

বাইহাটা, 14 ছেপ্টেম্বৰঃ বাইহাটাত কম্পিউটাৰ চোৰৰ আৰক্ষীৰ বিৰুদ্ধে সফল অভিযান ৷ শুকুৰবাৰে বাইহাটা চাৰিআলি আৰক্ষী থানাৰ ভাৰপ্ৰাপ্ত আৰক্ষী বিষয়া ভদ্ৰেশ্বৰ পেগুৰ নেতৃত্বত আৰক্ষীয়ে কম্পিউটাৰ চোৰৰ বিৰুদ্ধে এক অভিযান চলায় ৷

শেহতীয়াভাৱে উত্তৰ কামৰূপৰ বিদ্যালয় সমূহত কম্পিউটাৰ চোৰে ত্ৰাসৰ সৃষ্টি কৰি আহিছিল ৷ বিভিন্ন বিদ্যালয়ৰ পৰা তলা ভাঙি চোৰে চলাইছিল কম্পিউটাৰ চাফাই অভিযান ৷ তেনে সময়তে গোপন সূত্ৰৰ পম খেদি বাইহাটা আৰক্ষীয়ে চাংসাৰীৰ জালাহত এক অভিযান চলাই বৃহৎ পৰিমাণৰ কম্পিউটাৰ জব্দ কৰে ৷ এই সন্দৰ্ভত আৰক্ষীয়ে উৎপল দেৱ নাথ,আফজাল আলী আৰু মিৰান আলী নামৰ তিনিজন যুৱকক আটক কৰে ৷ এই বৃহৎ পৰিমাণৰ কম্পিউটাৰ সা-সামগ্ৰী খিনি চোৰৰ দলটোৱে কমলপুৰ সমষ্টিৰ বীৰদত্ত হাইস্কুলৰ পৰা চুৰি কৰিছিল বুলি আৰক্ষীয়ে জানিবলৈ দিয়ে ৷