প্ৰাক্তন বিধায়ক পানীৰাম ৰাভাৰ দেহাৱসান

অৱশেষত মৃত্যুৰে হাৰ মানিলে প্ৰাক্তন বিধায়ক তথা বৰমা আঞ্চলিক ছাত্ৰ সন্থাৰ প্ৰাক্তন সভাপতি পানীৰাম ৰাভাই ৷ শনিবাৰে বিয়লি গুৱাহাটীৰ হায়াত হাস্পতালত শেষ নিশ্বাস ত্যাগ কৰে নেতা গৰাকীয়ে ৷

গুৱাহাটী, 18 ছেপ্তেম্বৰ: প্ৰাক্তন বিধায়ক তথা বৰমা আঞ্চলিক ছাত্ৰ সন্থাৰ প্ৰাক্তন সভাপতি তথা সমাজকৰ্মী পানীৰাম ৰাভাৰ দেহাৱসান ৷ শনিবাৰে বিয়লি 3.30 বজাত ইহলীলা সম্বৰণ কৰে নেতা গৰাকীয়ে ৷ স্নায়ু ৰোগ আৰু মধুমেহ ৰোগত আক্ৰান্ত হৈ গুৱাহাটীৰ হায়াত হাস্পতালত চিকিৎসাধীন হৈ আছিল প্ৰাক্তন বিধায়কগৰাকী ৷ মৃত্যুৰ সময়ত তেওঁৰ বয়স আছিল 67 বছৰ ৷ 1991 চনত প্ৰথমবাৰৰ বাবে বিধায়ক হিচাপে নিৰ্বাচিত হৈছিল পানীৰাম ৰাভা ৷

1954 চনত বাক্সা জিলাৰ আলাগজাৰ গাঁৱত জন্মগ্ৰহণ কৰা পানীৰাম ৰাভাই সদৌ অসম ছাত্ৰ সন্থাৰ নেতৃত্বত হোৱা মাধ্যম আন্দোলন, ভাষা আন্দোলন আদিত সক্ৰিয়ভাৱে অংশগ্ৰহণ কৰিছিল ৷ 1985 চনত পানীৰাম ৰাভাই অগপ দলত যোগদান কৰে আৰু 1991 চনত প্ৰথমবাৰৰ বাবে বিধায়ক হিচাপে নিৰ্বাচিত হয় ৷ জনজাতীয় নেতাগৰাকীয়ে 1991 চনত বৰমা সমষ্টিৰ পৰা প্ৰয়াত ভৃগু কুমাৰ ফুকন নেতৃত্বাধীন নতুন অসম গণ পৰিষদৰ প্ৰাৰ্থী হিচাপে প্ৰথমবাৰলৈ অসম বিধান সভালৈ নিৰ্বাচিত হৈছিল ৷

লগতে পঢ়কঃ বড়োভূমিত এনকাউন্টাৰ:কেনেকৈ সংঘটিত হৈছিল সেই এনকাউন্টাৰ ?

পৰৱৰ্তী সময়ত 1996 চনত বৰমা সমষ্টিত ৰেখাৰাণী দাস বড়োৱে অগপৰ প্ৰাৰ্থিত্ব পোৱাত পানীৰাম ৰাভাই কংগ্ৰেছ দলত যোগদান কৰিছিল ৷ 2001 চনত কংগ্ৰেছৰ প্ৰাৰ্থী হিচাপে পানীৰাম ৰাভাই দ্বিতীয়বাৰৰ বাবে অসম বিধানসভালৈ নিৰ্বাচিত হৈছিল ৷

গুৱাহাটীৰ ওদালবাক্ৰাৰ নিৱাসী পানীৰাম ৰাভাই সক্ৰিয় ৰাজনীতিৰ পৰা আঁতৰি অহাৰ পাছত বিভিন্ন সামাজিক-সাংস্কৃতিক অনুষ্ঠানৰে জড়িত হৈ আছিল ৷ আনহাতে বৰমাৰ বিভিন্ন অনুষ্ঠানৰ সৈতেও জড়িত আছিল পানীৰাম ৰাভা ৷ পানীৰাম ৰাভাৰ মৃত্যুত ওদালবাক্ৰা অঞ্চলৰ লগতৰ সমগ্ৰ বৰমাত শোকৰ ছাঁ পৰিছে ৷

লগতে পঢ়কঃ নীল আকাশত পুৱাৰ ৰ’দকাঁচিয়লিত জিৰণি লৈছে এজাক পক্ষীয়ে

বৰমা আছু, বৰমা শাখা সাহিত্য সভা, বৰমা প্ৰাথমিক দুৰ্গা পূজা সমিতি, বৰমা আঞ্চলিক নিখিল বড়ো ছাত্ৰ সন্থাকে ধৰি বিভিন্ন ৰাজহুৱা অনুষ্ঠান-প্ৰতিষ্ঠান তথা দল-সংগঠনে পানীৰাম ৰাভাৰ মৃত্যুত গভীৰ শোক প্ৰকাশ কৰিছে ৷ প্ৰাক্তন বিধায়কগৰাকীৰ মৃত্যুত শোক প্ৰকাশ কৰাৰ লগতে তেওঁৰ প্ৰতি শ্ৰদ্ধা জনাই ওদালবাক্ৰা অঞ্চল সকলো ব্যৱসায়ীক প্ৰতিষ্ঠান সমূহ শনিবাৰে বিয়লি বন্ধ ৰখা হয় ৷

প্ৰাক্তন বিধায়ক পানীৰাম ৰাভাৰ মৃত্যুত প্ৰদেশ কংগ্ৰেছৰ সভাপতি ভূপেন কুমাৰ বৰা আৰু সাংসদ প্ৰদ্যুৎ বৰদলৈয়ে গভীৰ শোক প্ৰকাশ কৰিছে ৷ সভাপতি বৰাই এক শোক বাৰ্তাত কয় যে, পানীৰাম ৰাভাৰ মৃত্যু অসমৰ ৰাজনৈতিক ক্ষেত্ৰখনৰ বাবে অপূৰণীয় ক্ষতি ৷

লগতে পঢ়কঃ AMCH ৰ অধ্যক্ষ ডাঃ সঞ্জীৱ কাকতিক উন্নত চিকিৎসাৰ বাবে GMCH লৈ স্থানান্তৰ