কামৰূপ, 25মেঃ বিশ্বজুৰি সন্ত্ৰাস সৃষ্টি কৰা কৰ'ণা ভাইৰাছৰ ফলত দেশত বন্ধ হৈ আছিল বিমানবন্দৰসমূহ ৷ বন্ধ হৈ পৰিছিল আন্তঃৰাষ্ট্ৰীয় বিমানৰ লগতে ঘৰুৱা বিমান সেৱাৰ চলাচল । পোন প্ৰথমবাৰৰ বাবে এইদৰে বন্ধ হৈ পৰিছিল দেশৰ বিমানবন্দৰসমূহ । যোৱা ২৪ মাৰ্চৰ পৰা লকডাউনৰ ফলত দেশৰ সকলো বিমানবন্দৰ লগতে বন্ধ হৈ আছিল বৰঝাৰস্থিত লোকপ্ৰিয় গোপীনাথ বৰদলৈ আন্তৰাষ্ট্ৰীয় বিমানবন্দৰো ৷ জৰুৰী সেৱাৰ লগত জড়িত বিমানৰ বাহিৰে আন কোনো বিমানৰ চলাচল হোৱা নাছিল বিমানবন্দৰত । কিন্তু অসামৰিক বিমান পৰিবহন মন্ত্ৰী হৰদীপ সিং পুৰীৰ নিৰ্দেশৰ পিছতে আজিৰে পৰা আৰম্ভ হয় ঘৰুৱা বিমান সেৱা ।
গুৱাহাটী বৰঝাৰস্থিত লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমানবন্দৰতো আজিৰে পৰা আৰম্ভ ঘৰুৱা বিমান সেৱা । পুৱা ৮ বাজি ৪৫ মিনিটত প্ৰথমখন বিমান অৱতৰন কৰে বৰঝাৰ বিমানবন্দৰত ৷ দিল্লীৰ পৰা আহি উপস্থিত হয় প্ৰথমখন বিমান । ইণ্ডিগ' বিমানযোগে অহা প্ৰথমখন বিমানত মুঠ ১৬০ জন যাত্ৰী কঢ়িয়াই আনিছিল যদিও বৰঝাৰত ৭৮ জন যাত্ৰী নমাই বিমানখন পুনৰ ইম্ফললৈ ৰাওনা হয় । বিমানযোগে অহা সকলো যাত্ৰীকে বিমানবন্দৰতে প্ৰাথমিক পৰীক্ষা কৰা হয় । প্ৰাথমিক পৰীক্ষাৰ ফলাফল যদিহে পজিটিভ অথবা সন্দেহজনক তেনেহ'লে যাত্ৰীজনক বিমানবন্দৰৰ পৰাই কোৱাৰেন্টাইন কেন্দ্ৰলৈ লৈ যোৱা হ'ব আৰু বিমানবন্দৰতে সকলো যাত্ৰীৰ তথ্য সংগ্ৰহ কৰি থৈ দিয়া হ'ব ।
বিমানবন্দৰৰ সমীপৰ কিৰণশ্ৰী গ্ৰেণ্ড হোটেলত যাত্ৰী স্বাৱ টেষ্ট কৰি কামৰূপ মহানগৰ, হোজাই, দৰং, মৰিগাঁও জিলাৰ বাদে সকলো যাত্ৰীকে জিলাই জিলাই যাবলৈ দি প্ৰাথমিক পৰীক্ষা অনুযায়ী কৰা হ'ব কোৱাৰেন্টাইন ৷ যাত্ৰী সকলোৰ বাবে বিমানবন্দৰৰ পৰাই কৰা হৈছে বাছৰ ব্যৱস্থা । একেদৰে বিমানবন্দৰত কৰ‘ণাৰ সংক্ৰমন ৰোধ কৰিবৰ বাবে বিমানবন্দৰত ১মিটাৰৰ দূৰে দূৰে গঢ়া হৈছে চিহ্ন ৷ এই চিহ্নত থিয় দি যাত্ৰীসকলে অহা-যোৱা কৰিব লাগিব । বিমানবন্দৰত প্ৰৱেশৰ আগমুহুৰ্তত চিকিৎসা কৰ্মীয়ে পৰীক্ষা কৰাৰ পিছতে সোমাব পাৰিব ভিতৰচৰাত ৷ একেদৰে বিমানত নিব লগা বেগো কৰা হ'ব ছেনিটাইজ । যাত্ৰী সকলোৰ টিকট তথা পৰিচয় পত্ৰ সুৰক্ষাকৰ্মীক দেখুৱাব লাগিব কেমেৰাৰ আগতহে । যাত্ৰীৰ লগত থাকিব লাগিব আৰোগ্য সেঁতু এপ ৷ সোমবাৰে দুপৰীয়া ভাগত বিমানবন্দৰৰ পৰিস্থিতি পৰ্যবেক্ষণ কৰে হিমন্ত বিশ্ব শৰ্মাৰ লগতে ৰাজ্যিক স্বাস্থ্য মন্ত্ৰী পীযুষ হাজৰিকাই । আনহাতে আজি বৰঝাৰ বিমানবন্দৰত ৩৭খন বিমানৰ উৰণ-অৱতৰন হোৱাৰ কথা আছিল যদিও প্ৰতিকুল বতৰ আৰু বহিঃৰাজ্যত আম্ফানে চলোৱা তাণ্ডৱৰ ফলত ৮ খন বিমান অৱতৰন আৰু ৮ খন বিমানহে চলাচল কৰিব ৷
লগতে পঢ়কঃ কৰ'ণা ভাইৰাছৰ মাজতে দেশজুৰি উদযাপন ঈদ
