ৰঙিয়া, 30 জানুৱাৰী : ৰঙিয়াৰ বালিসত্ৰত মঙ্গলবাৰৰ পৰা আৰম্ভ হ’ব বালিসত্ৰ ৰাজহুৱা সবাহ মহোৎসৱ (Balisatra rajohua sobah mahutsav in Rangia)। ইয়াকে লৈ ব্যস্ততা বাঢ়িছে ৰঙিয়াৰ বালিসত্ৰবাসীৰ ৷ ৰাজ্যৰ লগতে দেশৰ বিভিন্ন প্ৰান্তৰ ভক্তই ইতিমধ্যে ভিৰ কৰিছেহি এই ৰাজহুৱা সবাহথলী ৷ ইফালে ৰাজ্যৰ সমান্তৰালভাৱে দেশৰ বিভিন্ন প্ৰান্তৰ ১ লাখ ভক্তক আদৰিবলৈ সাজু হৈছে ৰঙিয়াৰ বালিসত্ৰ ৰাজহুৱা সবাহ মহোৎসৱৰ আয়োজক সমিতি ।
মঙ্গলবাৰৰ পৰা আৰম্ভ হ’ব লগীয়া এই অনুষ্ঠান চলিব 4 ফেব্ৰুৱাৰীলৈকে ৷ ৫ দিনীয়াকৈ বিস্তৃত কাৰ্যসূচীৰে বালিসত্ৰ সৎসংগী সত্ৰৰ এই সৱাহ মহোৎসৱৰ বাবে ব্যাপক প্ৰস্তুতি চলাইছে বালিসত্ৰ ৰাজহুৱা সবাহ মহোৎসৱ পৰিচালনা সমিতিয়ে । প্ৰায় ৫০০ বছৰ পুৰণি এই পৰম্পৰাগত ধৰ্মীয় অনুষ্ঠানটি সুকলমে পালন কৰাৰ বাবে মূল পৰিচালনা সমিতিৰ লগতে ২০ খন উপ সমিতি গঠন কৰি দিয়া হৈছে বুলি উদ্যোক্তা সমিতিয়ে জানিবলৈ দিয়ে ।
প্ৰতিটো কাম শৃংখলাৱদ্ধ আৰু নিয়াৰিকৈ পৰিচালনা কৰিবৰ বাবে প্ৰায় ৫০০ গৰাকী বিভিন্ন বিষয়ববীয়া আৰু কৰ্মী বিভিন্ন ক্ষেত্ৰত নিয়োগ কৰা হৈছে বুলি আয়োজক সমিতিয়ে জানিবলৈ দিয়ে । ইতিমধ্যে আৰক্ষী প্ৰশাসনৰ দ্বাৰা ১০০ গৰাকী লোকক স্বেচ্ছাসেৱকৰ প্ৰশিক্ষণ প্ৰদান কৰা হৈছে । এই মহোৎসৱখনিৰ আন এক বিশেষ বৈশিষ্ট্য হৈছে আৰিয়া প্ৰজ্বলন ।
লোক বিশ্বাস অনুসৰি দিনটো উপবাসে থাকি সন্ধিয়া সৰিয়হ, তেল আৰু শংকু আকৃতিৰ শলিতাৰে ওৰে নিশাতো চাকি জ্বলাই আৰিয়া প্ৰজ্বলন কৰিলে ভক্তৰ মনোবাঞ্জা পূৰ্ণ হয় । সেয়েহে লক্ষাধিক ভক্তই ইয়াত নিজৰ মনোবাঞ্জা পূৰণৰ অৰ্থে মঙ্গলবাৰে সন্ধিয়া আৰিয়া প্ৰজ্বলন কৰিব বুলি আয়োজক সকলে জানিবলৈ দিয়ে । ইয়াৰ উপৰি আৰিয়া জ্বলাই উপবাসে থকা ৫০০০ ভক্তক অন্ন গ্ৰহণৰ বাবে সিধা প্ৰদানৰ ব্যৱস্থা কৰিছে আয়োজক সমিতিয়ে ।
মহোৎসৱটিকলৈ বালিসত্ৰ অঞ্চলৰ ৩২ খন গাঁৱৰ সহস্ৰাধিক লোকে দিনে নিশাই পেণ্ডেল আৰু আৰিয়া প্ৰজ্বলনৰ বাবে শাৰী পাতি কলগছ আদিৰ ব্যৱস্থা কৰাত ব্যস্ত হৈ পৰিছে । আনহাতে আৰম্ভণিৰে পৰা ধৰ্মীয় ভেদাভেদ নেওচি পালন কৰি অহা এই সবাহ খনলৈ সহযোগিতা আগবঢ়াই আহিছে সবাহস্থলীৰ দাঁতিতে থকা এখন ইছলাম সম্প্ৰদায়ৰ গাঁও ধুহিৰ লোকসকলে ।
এইবেলিও বহুকেইজন ইছলামধৰ্মী লোকে সবাহৰ প্ৰস্তুতিত স্বেচ্ছামুলকভাবে সহযোগিতা আগবঢ়াই সমন্বয়ৰ এক সুন্দৰ নিদৰ্শন তুলি ধৰিছে বুলি জানিবলৈ দিয়ে উদ্যোক্তা সমিতিয়ে ৷
লগতে পঢ়ক : Congress hoists tricolor at Srinagar party office : সামৰণি অনুষ্ঠানত অংশগ্ৰহণ কৰিব 21 টা ৰাজনৈতিক দলে
