বকো, 20 আগষ্টঃ বকো আৰক্ষী থানাৰ অন্তৰ্গত আলোকজাৰীত বুধবাৰে নিশা এটা পকী বাসগৃহৰ ওপৰত বজ্ৰপাত পৰি সংঘটিত হয় ভয়ংকৰ অগ্নিকাণ্ডৰ ঘটনা ৷
ব্ৰজপাত পৰাৰ ফলত সৃষ্টি হয় শ্বৰ্টচাৰ্কিটৰ ৷ ফলত সংঘটিত হয় এই অগ্নিকাণ্ড ৷ আলোকজাৰী নিবাসী ৰফিজ উদ্দিন নামৰ লোকজনৰ পুত্ৰ মতিবৰ আলীৰ ঘৰত নিশা চাৰে বাৰ মান বজাত এই ঘটনা সংঘটিত হয় ৷
নিমিষতে ঘৰটো জুইয়ে আগুৰি ধৰে ৷ তেনে অৱস্থাত ঘৰখনৰ ভিতৰত থকা তিনিটি শিশুকে ধৰি পৰিয়ালৰ লোকসকল কথমপি বাহিৰলৈ ওলাই আহি জীৱন ৰক্ষা কৰে ৷ পিছত স্থানীয় ৰাইজে পানী আৰু বোকাৰে জুই নুমুৱাবলৈ সক্ষম হয় যদিও ঘৰখন সম্পূৰ্ণৰূপে ভষ্মীভূত হৈ যায় ৷ প্ৰাকৃতিক দূৰ্যোগৰ বাবে সংঘটিত হোৱা এই অগ্নিকাণ্ডটোত পৰিয়ালটোৰ প্ৰায় পাঁচ লক্ষাধিক টকাৰ সা-সামগ্ৰী জুইত জাহ গৈছে বুলি জানিব পৰা গৈছে ৷
লগতে পঢ়কঃ জাতীয়তাবাদী ৰাজনৈতিক দল: আছু, যুৱছাত্ৰ পৰিষদে ঘোষণা কৰিলে উপদেষ্টা কমিটী
