ৰঙিয়া, 1 জুন : ক'ভিড (COVID-19) ৰ বাবে আদালতৰ কাম-কাজ বন্ধ হৈ থকাত গভীৰ সংকটত পৰিছে অধিবক্তা আৰু তৰণি সকল । যোৱা বছৰ ক'ভিডৰ প্ৰথমটো ঢৌত অধিকাংশ সময় আদালতৰ কাম-কাজ বন্ধ হৈ থকাৰ পিছত এইবাৰ ক'ভিডৰ (COVID-19) দ্বিতীয় ঢৌৰ বাবে আদালত পুনৰাই বন্ধ হৈ পৰাত অধিবক্তা আৰু তৰণি সকলে আৰ্থিক সমস্যাৰ সন্মুখীন হ’ব লগা হৈছে ।
ৰাজ্যৰ বিভিন্ন আদালত সমূহৰ দৰে ৰঙিয়া মহকুমা ন্যায়িক দণ্ডাধীশৰ আদালতত ওকালতিৰে জীৱিকা নিৰ্বাহ কৰা প্ৰায় ২০০ অধিবক্তাৰ বিশেষকৈ কনিষ্ঠ অধিবক্তা সকলৰ অৱস্থা একেবাৰেই শোচনীয় হৈ পৰিছে । তদুপৰি আদালতৰ বিভিন্ন প্ৰ-পত্ৰ পূৰণ কৰা তৰণি সকলৰ লগতে দলিল আৰু ষ্টাম্প পেপাৰ বিক্ৰী কৰাৰ ভেণ্ডৰ সকলৰো অৱস্থা বৰ্তমান একেবাৰে শোচনীয় ।
আদালতলৈ বিভিন্ন কামত অহা লোকৰ ওপৰতে নিৰ্ভৰশীল এইসকলে এতিয়া পৰিয়াল চলাবলৈ ভাবিলগীয়া হৈছে বহুবাৰ । বিশেষকৈ ৰঙিয়াৰ ২৫ গৰাকী তৰণিৰ লগতে কেবাগৰাকী ভেণ্ডৰৰ উপাৰ্জন বন্ধ হৈ পৰাত তেওঁলোকৰ পানীত হাঁহ নচৰাৰ দৰে অৱস্থাৰ সৃষ্টি হৈছে ।
কোনোধৰণৰ চৰকাৰী সা-সুবিধা নোপোৱা এইসকল ব্যক্তিয়ে ক'ৰণা কালত নামি অহা দুৰ্যোগৰ ফলত উপাৰ্জনহীন হৈ পৰিছে ৷ ফলত অন্য কোনো উপায় নথকাত এতিয়া সাহাৰ্যৰ বাবে চৰকাৰলৈ বাট চাই ৰৈছে । আদালতৰ কাম-কাজ সম্পূৰ্ণৰূপে পুনৰ আৰম্ভ নোহোৱালৈকে অধিবক্তা, তৰণি আৰু ভেণ্ডৰ সকলে যাতে কোনোমতে হ'লেও চলিব পাৰে তাৰ ব্যৱস্থা কৰিবলৈ চৰকাৰক অনুৰোধ জনাইছে ।
লগতে পঢ়ক: বৰপেটা জিলা দুৰ্যোগ প্ৰশমন প্ৰাধিকৰণৰ ডুবাৰু প্ৰশিক্ষণ
