কামৰূপ, 26 মেঃ 24 মে'ত সংঘটিত হাজোৰ সনাতন ডেকা হত্যাকাণ্ডৰ মূল অভিযুক্ত ইউচুফ আহমেদ আৰু ফইজুল হকৰ লগতে আন এগৰাকী অভিযুক্তক ইতিমধ্যে আটক কৰিবলৈ সক্ষম হৈছে হাজো আৰক্ষীয়ে । আনহাতে, পলাতক অৱস্থাত আছে হত্যাকাণ্ডটোৰ সৈতে জড়িত আন দুজন অভিযুক্ত । ইতিমধ্যে আৰক্ষীয়ে তিনিওকে সোধ-পোছ অব্যাহত ৰাখিছে ।
দোষীক উচিত শাস্তি প্ৰদানৰ দাবীত ৰাজ্যজুৰি সাব্যস্ত হৈছে প্ৰতিবাদ । ঘটনা সন্দৰ্ভত মুখ্যমন্ত্ৰীৰ হস্তক্ষেপ বিচাৰি দোষীক ফাষ্টট্ৰেক আদালতৰ জৰিয়তে উচিত শাস্তি প্ৰদানৰ দাবী উত্থাপন কৰিছে সদৌ অসম ছাত্ৰ সন্থাৰ সহকাৰী সাধাৰণ সম্পাদক প্ৰকাশ দাসে । ইয়াৰ উপৰিও দমদমা আঞ্চলিক ছাত্ৰ সন্থাৰ সহযোগত কামৰূপ জিলা ছাত্ৰ সন্থাই কামৰূপ আৰক্ষী অধীক্ষকক এই বিষয়ে স্মাৰক পত্ৰ প্ৰেৰণ কৰে ।
ঘটনা সন্দৰ্ভত কামৰূপ জিলা আৰক্ষী অধিক্ষক পাৰ্থ সাৰথি মহন্তই আয়োজন কৰে সংবাদমেল । ইতিমধ্যে ঘটনাৰ সৈতে জড়িত দুজনকৈ লোকক আটক কৰা হৈছে লগতে বাকী কেইজনৰ সন্ধানত আৰক্ষীয়ে তদন্ত অব্যাহত ৰাখিছে বুলি সংবাদমেলত প্ৰকাশ কৰে আৰক্ষী অধীক্ষক গৰাকীয়ে ।
উল্লেখ্য যে, হাজোৰ সনাতন ডেকা আৰু চাবুৱাৰ পৰাগজ্যোতি নেওগৰ হত্যাকাণ্ডক সাম্প্ৰদায়িক ৰূপ দিব বিচৰাসসকলৰ বিৰুদ্ধে কঠোৰ ব্যৱস্থা গ্ৰহণ কৰিব আৰক্ষীয়ে । সোমবাৰে এক সংবাদমেলযোগে এই কথা ঘোষণা কৰে অসম আৰক্ষীৰ সঞ্চালক প্ৰধান ভাস্কৰজ্যোতি মহন্তই । অসম আৰক্ষীৰ সঞ্চালক প্ৰধানগৰাকীয়ে কয় যে, অপৰাধ অনুসন্ধান শাখাই সকলো সময়তেই ছচিয়েল মিডিয়া নিৰীক্ষণ কৰি আছে । এক অসমীয়া ৱেপ পৰ্টেলে সমগ্ৰ ঘটনাক সাম্প্ৰদায়িক ৰূপ দিয়াৰ চেষ্টা কৰিছে । ইতিমধ্যে ৱেপ পৰ্টেলটোৰ বিৰুদ্ধে চিআইডিত গোচৰ ৰুজু কৰা হৈছে ।
ভূক্তভোগী দুয়োটা পৰিয়াললৈ 2 লাখ টকাৰ সাহাৰ্য প্ৰদানৰ কথা ঘোষণা কৰে মুখ্যমন্ত্ৰী সৰ্বানন্দ সোণোৱালে ।
লগতে পঢ়ক- ফেনে-ফুটুকাৰে বাঢ়িছে কপিলী নৈৰ জলপৃষ্ঠঃ আতংকিত কামপুৰবাসী
