ৰঙিয়া, 5 অক্টোবৰঃ শাসনাধিস্থ বিজেপি চৰকাৰে দেশৰ ৰাজহুৱা খণ্ডৰ প্ৰতিষ্ঠান সমূহ এপদ এপদকৈ ব্যক্তিগত খণ্ডৰ হাতত গতাই দিয়াৰ প্ৰতিবাদত সোমবাৰে উত্তাল হৈ পৰিল ৰঙিয়া ৷ শেহতীয়াভাৱে শক্তি বিভাগক ব্যক্তিগত খণ্ডৰ হাতত গতোৱাৰ যো-জা চলোৱাত জাঙুৰ খাই উঠিছে APDCL ৰ কৰ্মচাৰীসকল। ৰঙিয়াৰ বিদ্যুত উপসংমণ্ডল ২ ৰ কাৰ্যালয়ৰ সন্মুখত শক্তি বিভাগৰ কৰ্মচাৰীসকলে অৱস্থান ধৰ্মঘট পালন কৰে। ইয়াৰ পিচতে ৰঙিয়া চহৰৰ মাজেৰে প্ৰতিবাদী সমদল উলিয়াই । প্ৰতিবাদকাৰীসকলে হাতে হাতে প্লে-কাৰ্ড, বেনাৰ লৈ চৰকাৰ বিৰোধী শ্লোগানেৰে পৰিবেশ উত্তাল কৰি তোলে।
পশ্চিম বিলাসীপাৰাঃ শক্তি বিভাগক ব্যক্তিগতকৰণ কৰাৰ প্ৰতিবাদত উত্তাল হৈ পৰিল বিলাসীপাৰা ৷ নিখিল ভাৰত বিদ্যুৎ কৰ্মচাৰী মহাসংঘৰ আহ্বানত আছাম ষ্টেট পাৱাৰ ৱ'কাৰ্চ ইউনিয়ন বিলাসীপাৰা শাখাই দুই ঘন্টীয়া ধৰ্ণা কাৰ্যসূচী পালন কৰে ৷ বিলাসীপাৰা বিদ্যুৎ উপ সংমণ্ডল কাৰ্যালয়ৰ সন্মুখত বিভিন্ন শ্লোগানেৰে পালন কৰে ধৰ্ণা কাৰ্যসূচী ৷ শক্তি বিতৰণ প্ৰতিস্থান সমূহৰ ব্যক্তিগতকৰণ আৰু কৰ্মচাৰীৰ সমস্যা সমাধানৰ দাবীত সাব্যস্ত কৰে প্ৰতিবাদ ৷
দৰংঃ অসম শক্তি বিতৰণ কোম্পানী লিমিটেডৰ অধীনৰ মঙলদৈ সংমণ্ডলৰ কৰ্মচাৰী সকলে বিদ্যুৎ বিল-২০২০ বিৰোধিতাৰে কাৰ্যালয়ৰ সন্মুখত প্ৰতিবাদী কাৰ্যসূচী পালন কৰিলে ৷ সৰ্বভাৰতীয় বিদ্যুৎ পৰিষদৰ আহ্বানত পালন কৰা এই প্ৰতিবাদৰ জৰিয়তে কেন্দ্ৰীয় চৰকাৰলৈ বিদ্যুত বিল ২০২০ বাতিল কৰিবলৈ দাবী জনায় প্ৰতিবাদকাৰীয়ে ৷
লগতে পঢ়কঃ ভূমিক কেন্দ্ৰ কৰি নগাঁৱৰ এখন নাৰ্ছিং হোমত উত্তপ্ত পৰিস্থিতি
নাজিৰাঃ কেন্দ্ৰীয় চৰকাৰে সমগ্ৰ দেশৰ লগতে অসমৰ বিদ্যুত খণ্ডকো ব্যক্তিগত প্ৰতিস্থানৰ অধীন কৰাৰ বিৰোধিতাৰে আন্দোলনত নামিছে বিদ্যুত কৰ্মচাৰী সকল ৷ সোমাবৰে অসম বিদ্যুত বিতৰণ প্ৰতিস্থানৰ নাজিৰা সংমণ্ডলৰ গড়গাওঁ কাৰ্যালয়ৰ সন্মুখত আসাম ষ্টেট পাৱাৰ ৱ’কাৰ্চ ইউনিয়নৰ গড়গাঁও শাখাৰ উদ্যোগত চৰকাৰৰ বিৰুদ্ধে ধৰ্ণা কাৰ্যসূচী ৰূপায়ণ কৰে ৷ বিদ্যুত বিতৰণ কোম্পানীক ব্যক্তিগতকৰণ বন্ধ কৰা ,কৰ্মচাৰীৰ দীৰ্ঘদিনৰ সমস্যা সমাধানৰ দাবীত দুঘন্টীয়া ধৰ্ণা কাৰ্যসূচীৰে পৰিবেশ উত্তাল কৰি তোলে ৷
বঙাইগাঁওঃ শেহতীয়াকৈ কেন্দ্ৰীয় আৰু ৰাজ্য চৰকাৰে এ পি ডি চি এলক ব্যক্তিগত কোম্পানীৰ হাতত গতাই দিয়াৰ সিদ্ধান্ত গ্ৰহণ কৰাৰ বিৰোধিতাৰে প্ৰতিবাদমুখী হৈ পৰিছে বঙাইগাঁৱৰ বিদ্যুৎ কৰ্মচাৰী সকল ৷ সোমবাৰে বিদ্যুৎ বিভাগৰ কৰ্মচাৰী সকলে ব্যক্তিগতকৰণৰ বিৰুদ্ধে এ পি ডি চি এলৰ কাৰ্যালয়ৰ সন্মুখত দুই ঘন্টীয়া ধৰ্ণা কাৰ্যসূচী ৰূপায়ণ কৰে ৷
লগতে পঢ়কঃ ডকমকা ডাইনী কাণ্ড সন্দৰ্ভত পুনৰ ৯ জনক গ্ৰেপ্তাৰ
