প্ৰথমে আদায় দিলে কৰ, তাৰপিছত ট্ৰাক লৈ পলায়ন

আন্ধাৰৰ সুযোগতে ট্ৰাক চুৰি অচিনাক্ত দুৰ্বৃত্তৰ ৷ চুৰিৰ পিছত পলায়ন কৰোতে পোৱা টোলগেটত আদায় দিলে কৰ ৷ আৰু তাৰপিছত...

ৰঙিয়া, 18 আগষ্ট : ৰঙিয়াৰ তুলসীবাৰীৰ পৰা সোমবাৰে নিশা কোনো অচিনাক্ত দুৰ্বৃত্তৰ দলে আন্ধাৰৰ সুযোগ লৈ এখন ট্ৰাক চুৰি কৰি নিয়ে । মঙলবাৰে পুৱা চালকে ট্ৰাকখন কামলৈ নিবলৈ অহাৰ সময়ত পোহৰলৈ আহে এই কথা ৷ চালকে ট্ৰাকখন নেদেখি লগে লগে ট্ৰাকখনৰ স্বত্বাধিকাৰী ভাৰত পালক এই বিষয়ে অৱগত কৰে ৷

ট্ৰাকখনৰ স্বত্বাধিকাৰীয়ে ম’বাইলত টোলগেটৰ পৰা অহা মেছেজৰ ভিত্তিত দুৰ্বৃত্তৰ দলটোৱে কামৰূপৰ মদনপুৰৰ টোলগেটত কৰ আদায় দি ট্ৰাক লৈ পলায়ন কৰাৰ কথা জানিব পাৰে ৷ স্বত্বাধিকাৰীগৰাকীয়ে জানিবলৈ দিয়া অনুসৰি, ভাৰত-ভূটান আন্তঃৰাষ্ট্ৰীয় ঘাইপথৰ তুলসীবাৰীৰ পলিষ্টাৰ চ’কৰ পৰা দুৰ্বৃত্তই চুৰি কৰি নিয়ে AS 14 A 8152 নম্বৰৰ ট্ৰাকখন ।