গুৱাহাটী, 24 অক্টোবৰ: বুধবাৰে সামৰণী পৰে মহানগৰীত অনুষ্ঠিত হোৱা ভাৰত-বাংলাদেশ অংশীদাৰ সন্মিলনৰ ৷ মহানগৰীৰ জালুকবাৰীস্থিত হোটেল ৰেডিচন ব্লুত দুদিনীয়া কাৰ্যসূচীৰে অনুষ্ঠিত হৈছিল এই সন্মিলন ৷ দুয়োখন ৰাষ্ট্ৰৰ মাজৰ সম্পৰ্ক সূদৃঢ় কৰাৰ লক্ষ্যৰে অনুষ্ঠিত হৈছিল এই সন্মিলন ৷ লগতে যোগাযোগৰ ক্ষেত্ৰতো বিশেষ পদক্ষেপ লোৱাৰো সিদ্ধান্ত লোৱা হয় উক্ত সন্মিলনখনত ৷ দুয়োখন দেশে একলগে মিলি বাণিজ্যিক দিশত আগবাঢ়িব। বিনিয়োগকাৰীসকলে বিনিয়োগ কৰিব পাৰিব নৰ্থ-ইষ্ট তথা ভাৰতত ।
এই সন্মিলনত যোগীঘোপাৰ মাল্টি ল'জিষ্টিকছ পাৰ্ক উন্নত কৰা,জল পথ সূচল কৰাৰ সিদ্ধান্ত গ্ৰহণ কৰা হয়।পৰ্যটনৰ ক্ষেত্ৰতো দুয়োখন দেশৰ মাজত বুজাবুজিৰ চুক্তি স্বাক্ষৰ কৰা হয় ৷ এই সন্মিলনৰ সামৰণি অনুষ্ঠানত উপস্থিত থাকে কেন্দ্ৰীয় মন্ত্ৰী ৰামেশ্বৰ তেলী,অসম চৰকাৰৰ মন্ত্ৰী চন্দ্ৰমোহন পাটোৱাৰী,ভাৰত-বাংলাদেশ উদ্যোগ আৰু বাণিজ্যিক বিভাগৰ সচিব আব্দুল মটলিব আলী,বাংলাদেশৰ যোগাযোগ আৰু পথ উন্নয়ন বিভাগৰ অতিৰিক্ত সচিব ইছানি ইলাহীকে প্ৰমুখ্য কৰি দুয়োখন দেশৰ ভালেমান শীৰ্ষ পৰ্যায়ৰ বিষয়া ৷
