গুৱাহাটী, ১৯ ডিচেম্বৰ : এখন নতুন বিধেয়ক আৰু ১৫ খন সংশোধনী বিধেয়ক উত্থাপনেৰে সোমবাৰৰ পৰা অনুষ্ঠিত হ’ব অসম বিধানসভাৰ শীতকালীন অধিৱেশন(Winter Session of Assam Assembly) । ইতিমধ্যে, ক'ভিড প্ৰট'কলৰ মাজেৰে সুকলমে অধিৱেশন অনুষ্ঠিত কৰাৰ প্ৰস্তুতি প্ৰায় সম্পূৰ্ণ কৰি তুলিছে বিধানসভা সচিবালয়ে । অধিৱেশনৰ অন্তিম দিনা অৰ্থাৎ ২৩ ডিচেম্বৰত সদনত গৃহীত কৰা হ’ব আটাইকেইখন বিধেয়ক ।
মনকৰিবলগীয়া যে, এই অধিৱেশনত সদনত উত্থাপিত হ’বলগীয়া ১৫ খন সংশোধনী বিধেয়কৰ ভিতৰত আছে গো-সুৰক্ষা আইন(Cattle preservation bill)ৰো এখন সংশোধনী বিধেয়ক । বিধানসভা সচিবালয়ৰ সূত্ৰই প্ৰকাশ কৰা অনুসৰি ২১ ডিচেম্বৰৰ কাৰ্যক্ৰমণিকাত থাকিব বেচৰকাৰী কাৰ্যসূচী । ইয়াৰ উপৰিও প্ৰশ্নোত্তৰ কালৰ লগতে ২০২১-২০২২ বৰ্ষৰ পৰিপূৰক দাবী আৰু পৰিপূৰক বিনিয়োজনৰ তালিকাও সদনত উত্থাপন কৰা হ’ব ।
যি সময়ত ৰাজ্যজুৰি গো-সুৰক্ষা আইনৰ বিৰুদ্ধে বিৰোধীয়ে সৰৱ ভূমিকা লৈছে সেই সময়ত এতিয়া সদনত এই বিষয়টোক লৈ তীব্ৰ বিতৰ্কৰ সৃষ্টি হ’ব বুলি আশা কৰা হৈছে ৷ উল্লেখযোগ্য যে, কেৱল অসমতেই নহয় সমগ্ৰ দেশজুৰি এই গো-সুৰক্ষা আইনক লৈ হৈছে বিশেষ চৰ্চা ৷ বিভিন্ন সময়ত ৰাষ্ট্ৰীয় প্ৰেক্ষাপটত মুখ্যমন্ত্ৰী ড৹ হিমন্ত বিশ্ব শৰ্মায়ো এই আইনখনৰ সমৰ্থনত প্ৰকাশ কৰিছে বিশেষ সৰৱতা(Assam CM on cattle preservation bill) ৷
লগতে পঢ়ক : Himanta Biswa Sarma at GMCH : জিএমচিএইচত মুখ্যমন্ত্রীৰ ছাডেন ভিজিট
