পুৱা 9 বজাৰ দহটা শীৰ্ষ বাতৰি...

পুৱা 9 বজাৰ দহটা শীৰ্ষ বাতৰি...

নিৰ্বাচনৰ প্ৰাকক্ষণত শনিবাৰে বাক্সা জিলাৰ বৰমাত গণ সুৰক্ষা পাৰ্টিয়ে এক সংবাদ মেল সম্বোধন কৰে ৷ সংবাদমেলত ৬২ নং বৰমা বিধান সভা সমষ্টিত নিৰ্দলীয় প্ৰাৰ্থী নৱ কুমাৰ শৰণীয়াক পূৰ্ণ সমৰ্থন আগবঢ়োৱাৰ কথা আনুষ্ঠানিকভাৱে ঘোষণা কৰে ৷ তদুপৰি বিটিচিৰ বাকী ১১ টা সমষ্টিত মিত্ৰজোঁটৰ প্ৰাৰ্থীক সমৰ্থন জনোৱা হ'ব বুলিও ঘোষণা কৰে দলটোৰ নেতৃত্বই ।

শনিবাৰে ১০৩ নং আমগুৰি বিধান সভা সমষ্টিৰ কংগ্ৰেছ প্ৰাৰ্থী ড৹ অংকিতা দত্তক চাহ শ্ৰমিকৰ সৈতে দেখা পোৱা গ'ল ৷ ৬১ নং ৰাষ্ট্ৰীয় ঘাই পথৰ বৰবাম চাহ বাগিছাত চাহ শ্ৰমিকৰ সৈতে ব্যস্ত হৈ পৰিল কংগ্ৰেছ প্ৰাৰ্থী গৰাকী ৷ আনকি চাহ শ্ৰমিকসকলৰ সৈতে ফটোও উঠে অংকিতা দত্তই ৷ তদুপৰি বাগিচাত কৰ্মৰত চাহ শ্ৰমিকসকলক আগন্তুক নিৰ্বাচনত হাতৰ চিহ্নত ভোট দিবলৈ অনুৰোধ জনায় কংগ্ৰেছ প্ৰাৰ্থী অংকিতা দত্তই ৷

বকোৰ সোণতলীত কংগ্ৰেছ প্ৰাৰ্থী নন্দিতা দাসৰ বিৰুদ্ধে কংগ্ৰেছ কৰ্মীৰ তীব্ৰ প্ৰতিবাদ ৷ বকো সমষ্টিত বিগত ৫বছৰীয়া কাৰ্যকালত বিধায়িকা গৰাকীয়ে কোনো উন্নয়ন মূলক কাম নকৰাৰ অভিযোগ উত্থাপন কৰিছে সমষ্টিবাসী তথা একাংশ কংগ্ৰেছীয়ে ৷

শনিবাৰে মৎস্য উৎপাদন কৰি দেশৰ অৰ্থনৈতিক ভেটি সবল কৰাৰ লগতে স্বাৱলম্বী হোৱাৰ লক্ষ্যৰে সৰ্থেবাৰীৰ বৰকণা বিলত কেন্দ্ৰীয় অন্তৰ্দেশীয় মীনক্ষেত্ৰ গৱেষণা কেন্দ্ৰৰ উদ্যোগত আয়োজন কৰা হয় এখন বিশেষ সজাগতা সভা ৷ সজাগতা সভাত মীনপালক সকলক প্ৰশিক্ষণ দিয়াৰ লগতে বৈজ্ঞানিক পদ্ধতিৰে বিলত "সজাত" মীন পালন সম্পৰ্কে ব্যৱহাৰিক জ্ঞান দিয়াৰ ব্যৱস্থা গ্ৰহণ কৰা হয় ৷

কি কি উল্লেখ আছে কংগ্ৰেছ নিৰ্বাচনী ইস্তাহাৰত ? শনিবাৰে ৰাহুল গান্ধীয়ে প্ৰকাশ কৰিলে নিৰ্বাচনী ইস্তাহাৰ ৷

বিহালী বুৰৈ নদীৰ সংযোগস্থলীত শনিবাৰে সন্ধানহীন হয় দুজনকৈ যুৱক ৷ জানিব পৰা মতে,সন্ধানহীন হোৱা আকাশ ঢাকাল আৰু মানস গজেল নামৰ দুয়োগৰাকী যুৱক প্ৰিন্স ঢাকাল নামৰ এগৰাকী সমনীয়াৰ সৈতে নদীত গা ধুবলৈ গৈছিল ৷ কিন্তু গা ধুবলৈ গৈ প্ৰিন্স ঢাকাল উভতি আহে যদিও আন দুয়োজন যুৱক নদীৰ বুকুত সন্ধানহীন হয় ৷

অসমৰ বাবে কংগ্ৰেছে প্ৰকাশ কৰিলে নিৰ্বাচনী ইস্তাহাৰ ৷ ৰাজ্যৰ প্ৰতিখন জিলাত গো-শালা স্থাপনৰ প্ৰতিশ্ৰুতিৰে নিৰ্বাচনী ইস্তাহাৰ প্ৰকাশ কৰিছে দলটোৱে ৷ নিৰ্বাচনী বৈতৰণী পাৰ হোৱাৰ বাবে গেৰুৱা দল বিজেপিৰ পাছতে এইবাৰ কংগ্ৰেছেও ল'লে 'গাইগৰুৰ পথ' ৷

মিত্রজোঁটৰ পৰা বিগত নিৰ্বাচনত প্ৰতিদ্বন্দ্বিতা কৰি লখিমপুৰ সমষ্টি দখল কৰা বিধায়ক উৎপল দত্তই এইবাৰ মিত্ৰজোঁটৰ টিকটৰ পৰা বঞ্চিত হৈ অগপৰ পৰাই প্ৰতিদ্বন্দ্বিতা কৰিছে । মিত্ৰজোঁটৰ প্ৰতি ক্ষোভ উজাৰি দত্তই কয় যে, লখিমপুৰত মিত্ৰতা আৰু বন্ধুত্ব সুলভ সৰ্ম্পক একো নাই । নিজা শক্তিৰে যুঁজ দি মই সমষ্টি দখল কৰিম ।

শুকুৰবাৰে ত্ৰিপুৰাৰ উপ-মুখ্যমন্ত্ৰী জিষ্ণু দেৱবাৰ্মাই ২২৭২৪.৫০ কোটি টকাৰ ঘাটি বাজেট দাখিল কৰে । বাজেটত পুঁজি নিৰ্ধাৰণৰ ক্ষেত্ৰত পৰ্যটন, তথ্য প্ৰযুক্তি, কৃষি, স্বাস্থ্য, শিক্ষা খণ্ডত অধিক গুৰুত্ব আৰোপ কৰা হৈছে ।

12 খন জিলা এতিয়া বংগীয়মূলৰ মুছলমানৰ দখলত: চন্দ্ৰমোহন পাটোৱাৰী

চন্দ্ৰমোহন পাটোৱাৰীয়ে কয় যে, অসমীয়া মুছলমান খিনিয়ে এতিয়াও কিয় কংগ্ৰেছৰ লগত আছে বুজি নাপাও । বংগমূলীয় মুছলমানৰ তুলনাত অসমীয়া মুছলমানসকল বঞ্চিত হৈ আছে । বিজেপিৰ দিনত অসমীয়া মুছলমানৰ বাবে এশ কোটি টকা দিয়া হৈছে । তাৰ পিছতো কংগ্ৰেছ কৰিলে কি কম বুলিও মন্তব্য কৰে চন্দ্ৰমোহন পাটোৱাৰীয়ে ।