11 বজাৰ শীৰ্ষ 10 বাতৰি...

11 বজাৰ শীৰ্ষ 10 বাতৰি...

আজি ৰাজ্যৰ 5টা সমষ্টিত আৰম্ভ হৈছে উপ নিৰ্বাচন ৷ জনতা জনাৰ্দনে নিৰ্ধাৰণ কৰিব প্ৰায় 31 গৰাকী প্ৰাৰ্থীৰ ভাগ্য ৷ ইতিমধ্যে পুৱা 7 বজাৰে পৰা আৰম্ভ হৈছে ভোটগ্ৰহণ প্ৰক্ৰিয়া ৷

শনিবাৰে পুৱাৰ ভাগতে তামুলপুৰ চৰকাৰী মজলীয়া বিদ্যালয়ত ভোটদান সম্পন্ন কৰে কোকৰাঝাৰ সমষ্টিৰ সাংসদ নৱ শৰণীয়াই ৷ সমষ্টিটোৰ গণ সুৰক্ষা পাৰ্টীৰ প্ৰাৰ্থীগৰাকীয়ে প্ৰায় 20 হাজাৰ ভোটত জয়লাভ কৰিব বুলি আশাবাদী নৱ শৰণীয়া ৷

জ্যোতিষীয়ে নিৰ্ধাৰণ কৰি দিয়া সময় চাই নিজৰ ভোটদান সাব্যস্ত কৰিলে ভৱানীপুৰ সমষ্টিৰ বিজেপি প্ৰাৰ্থী ফণীধৰ তালুকদাৰে ৷ ভোটদান কৰি বিধানসভাৰ মূল নিৰ্বাচনতকৈ উপ নিৰ্বাচনৰ বাবে সমষ্টিবাসীৰ মনত অধিক উৎসাহ দেখিবলৈ পোৱা বুলি মন্তব্য কৰে ফণী তালুকদাৰে ৷

উপ নিৰ্বাচনৰ বাবে শনিবাৰৰ পুৱাৰে পৰা আৰম্ভ হৈছে ভোটগ্ৰহণ প্ৰক্ৰিয়া । দেশৰ ৩ টা লোকসভা সমষ্টি আৰু ৩০ টা বিধানসভা সমষ্টিত অনুষ্ঠিত হৈছে উপ নিৰ্বাচন(By poll) । পশ্চিমবংগ, হাৰিয়ানা, বিহাৰ, অসম, হিমাচল প্ৰদেশ, মধ্য প্ৰদেশ, মহাৰাষ্ট্ৰ, অন্ধ্ৰ প্ৰদেশ, কৰ্ণাটক, ৰাজস্থান, তেলেংগানা, মেঘালয়, মিজোৰাম আৰু নাগালেণ্ডত চলি আছে ভোটগ্ৰহণ প্ৰক্ৰিয়া ।

ৰাইজৰ দলৰ মুখপাত্ৰ জ্ঞানশ্ৰী বৰাক সামাজিক মাধ্যমত একাংশ ব্যক্তিয়ে অশ্লীল মন্তব্য প্ৰদান কৰা কাৰ্যক লৈ ৰাজ্যৰ সৰ্বত্ৰে সৃষ্টি হৈছে প্ৰতিক্ৰিয়া ৷ ৰাজনৈতিক বাদানুবাদৰ পিছতে বৰাৰ ফটো বিজেপিৰ IT শাখাই বিকৃত ৰূপত উপস্থাপন কৰি অশ্লীল বাক্যবাণ প্ৰয়োগেৰে সামাজিক মাধ্যমত প্ৰচাৰ কৰা বুলি অভিযোগ উত্থাপিত হৈছিল ৷ উক্ত ঘটনা সন্দৰ্ভত বিভিন্নজনে বিভিন্ন প্ৰতিক্ৰিয়া প্ৰকাশ কৰাৰ সমান্তৰালকৈ থাওৰাৰ উপ নিৰ্বাচনৰ চিপিআই প্ৰাৰ্থী তথা গুৱাহাটী উচ্চ ন্যায়ালয়ৰ অধিবক্তা কৃষ্ণ গগৈয়ে প্ৰকাশ কৰিছে প্ৰতিক্ৰিয়া ৷

হঠাতে হুৱাদুৱা লাগিল চৰাইদেউৰ সোণাৰি আৰক্ষী চকীত ৷ ভূমিকম্পৰ ফলত ঘৰৰ ভিতৰত আৱদ্ধ হৈ পৰিল আৰক্ষী ৷ প্ৰকৃততে কি হৈছিল আৰক্ষী চকীখনত ?

শুকুৰবাৰে ঘোষণা কৰা হ'ল সৰ্বভাৰতীয় লোকসেৱা আয়োগৰ চলিত বৰ্ষৰ প্ৰাৰম্ভিক পৰীক্ষাৰ ফলাফল । সৰ্বভাৰতীয় লোক সেৱা আয়োগে এক বিবৃতিযোগে প্ৰকাশ কৰিছে যে, যোৱা ১০ অক্টোবৰত অনুষ্ঠিত হোৱা অসামৰিক সেৱাৰ প্ৰাৰম্ভিক পৰীক্ষাৰ ফলাফল তেওঁলোকৰ ৱেবছাইটযোগে ঘোষণা কৰা হৈছে ।

মৰিয়নী সমষ্টিত শনিবাৰে পুৱাৰে পৰা ভোটগ্ৰহণ কেন্দ্ৰত দেখিবলৈ পোৱা গৈছে ভোটাৰৰ দীঘলীয়া শাৰী ৷ সমষ্টিটোত মুঠ 183 টা ভোটকেন্দ্ৰত অনুষ্ঠিত হৈছে ভোটগ্ৰহণ প্ৰক্ৰিয়া ৷

আজি মাজুলীৰ বাদে ৰাজ্যৰ অন্য 5টা সমষ্টিত পুৱা 7 বজাৰে পৰা আৰম্ভ হৈছে ভোটগ্ৰহণ প্ৰক্ৰিয়া ৷ সম্পূৰ্ণ ক’ভিড প্ৰট’কল মানি অব্যাহত আছে ভোটদান ৷ ভৱানীপুৰ সমষ্টিৰ হাঠিনাপুৰ বিদ্যামন্দিৰৰ ভোটগ্ৰহণ কেন্দ্ৰতো শান্তিপূৰ্ণভাৱে আৰম্ভ হৈছে ভোটগ্ৰহণ প্ৰক্ৰিয়া ৷ উল্লেখ্য যে, সমষ্টিটোৰ গেৰুৱা দলৰ নিৰ্বাচনী প্ৰাৰ্থী ফণী তালুকদাৰে এই কেন্দ্ৰতে সাব্যস্ত কৰিব ভোটাধিকাৰ ৷

বিজেপি IT চেলৰ কৰ্মীৰ বিৰুদ্ধে এজাহাৰ দাখিল ৰাইজৰ দলৰ মুখপাত্ৰ জ্ঞানশ্ৰী বৰাৰ ৷ শেহতীয়াকৈ একাংশ লোকে সামাজিক মাধ্যমত কিছু অশ্লীল মন্তব্য কৰা দেখা গৈছিল ৷