গুৱাহাটী, ৯ জানুৱাৰী : এফালে ৰাহুল গান্ধীৰ অসমত ৮ দিনীয়া ভাৰত জোড়ো ন্যায় যাত্ৰাক লৈ ব্যাপক প্ৰস্তুতি কংগ্ৰেছৰ ৷ আনহাতে তিনিজনকৈ জ্যেষ্ঠ কংগ্ৰেছী নেতাৰ কংগ্ৰেছ ত্যাগৰ যো-জা চলিছে ৷ এই খবৰে তোলপাৰ লগাইছে ৰাজ্যত ৷
কংগ্ৰেছ ত্যাগ কৰিবলৈ যো-জা চলাইছে তিনি জ্যেষ্ঠ নেতা অপূৰ্ব কুমাৰ ভট্টাচাৰ্য, শংকৰ প্ৰসাদ ৰায় আৰু কুলদীপ বৰুৱাই । ৰাজনৈতিক মহলৰ খবৰ মতে অপূৰ্ব কুমাৰ ভট্টাচাৰ্যই অসম গণ পৰিষদৰ সৈতে যোগাযোগ কৰিছে । শীঘ্ৰেই হয়তো অগপত যোগদান কৰিব অপূৰ্ব কুমাৰ ভট্টাচাৰ্যই৷
ভট্টাচাৰ্যই নিজেই সামাজিক মাধ্যম Xত ইতিমধ্যে উল্লেখ কৰিছে যে টালি-টোপোলা বান্ধিবলৈ সাজু তেওঁ ৷ কংগ্ৰেছৰ অসম প্ৰদেশ কমিটিৰ নিৰ্বাচন সমিতিৰ এখন তালিকা প্ৰকাশ পোৱাৰ পিচতে এই প্ৰতিক্ৰিয়া প্ৰকাশ অপূৰ্ব কুমাৰ ভট্টাচাৰ্যৰ । উল্লেখযোগ্য যে তালিকাখনত নাম নাছিল ভট্টাচাৰ্যৰ ৷
অগপৰ তৰফৰ পৰাও অপূৰ্ব কুমাৰ ভট্টাচাৰ্যই দলটোত যোগদান কৰাৰ সম্ভাৱনাৰ কথা ব্যক্ত কৰিছে ৷ আনহাতে, বিজেপিৰ ভিতৰুৱা তথ্য অনুসৰি আন এজন জ্যেষ্ঠ কংগ্ৰেছী নেতাই বিজেপিত যোগদান কৰাৰ বাবে প্ৰস্তুতি চলাইছে ৷ সদৌ অসম ছাত্ৰ সন্থাৰ প্ৰাক্তন সভাপতি শংকৰ প্ৰসাদ ৰয়ে কংগ্ৰেছ দলত যোগদান কৰি দুবাৰকৈ বঙাইগাঁও বিধানসভা সমষ্টিৰ পৰা প্ৰতিদ্বন্দিতা কৰিছিল ।
ই টিভি ভাৰতৰ ব্যুৰ’ চীফ প্ৰশান্ত কুমাৰ বৰুৱাৰ সৈতে হোৱা বাৰ্তালাপত শংকৰ প্ৰসাদ ৰয়ে এই প্ৰসংগত নিজৰ প্ৰতিক্ৰিয়া প্ৰকাশ কৰি কয় যে, বৰ্তমানলৈকে বিজেপিত যোগদানৰ কথা চূড়ান্ত হোৱা নাই । লগতে তেওঁ উল্লেখ কৰে যে লুৰীণজ্যোতি গগৈয়েও তেওঁক অজাপত যোগদান কৰি একেলগে কাম কৰাৰ বাবে আহ্বান জনাইছে ৷ আনহাতে আপ, অসমৰ সভাপতি ভৱেন চৌধুৰীয়ে আপত যোগদান কৰিবলৈ শংকৰ প্ৰসাদ ৰায়ক আহ্বান জনাইছে ৷ প্ৰয়োজনত আপ, অসমৰ সভাপতিৰ দায়িত্ব আগবঢ়াবলৈয়ো সাজু ভৱেন চৌধুৰী । এই কথা জানিবলৈ দিছে শংকৰ প্ৰসাদ ৰায়ে ৷
কংগ্ৰেছ দলটোৰ ভিতৰ চ’ৰাৰ শেহতীয়া কিছু কাম-কাজক লৈয়ো অসন্তুষ্টি প্ৰকাশ কৰিছে শংকৰ প্ৰসাদ ৰায়ে৷ তেওঁ কয় যে অসমৰ বিৰোধী ১৫ টা ৰাজনৈতিক দলৰ সভা উজনি অসমত পাতিব লাগিছিল কংগ্ৰেছে৷ কিন্তু এয়া চাপৰৰ পৰা আৰম্ভ কৰা প্ৰসংগত অসন্তুষ্টি প্ৰকাশ কৰিছে শংকৰ প্ৰসাদ ৰায়ে ৷
ই টিভি ভাৰতৰে হোৱা কথা-বতৰাৰ পৰা এটা কথা ধাৰণা কৰিব পাৰি যে সোনকালেই কংগ্ৰেছ ত্যাগ কৰিবলৈ সাজু হৈছে শংকৰ প্ৰসাদ ৰায় । ইফালে, ছিপাঝাৰ সমষ্টিত ২০২১ৰ বিধানসভা নিৰ্বাচনত কংগ্ৰেছ দলৰ প্ৰাৰ্থী হৈ নিৰ্বাচন খেলিছিল কুলদীপ বৰুৱাই ৷ বৰুৱায়ো কংগ্ৰেছ এৰি বিজেপিত যোগদানৰ বাবে প্ৰস্তুতি চলাইছে ৷
কুলদীপ বৰুৱাই আনকি যোৱা বিধানসভা নিৰ্বাচনত কংগ্ৰেছৰ চিপৰাং ৰাজনীতিৰ বাবেই নিৰ্বাচনত পৰাজয়বৰণ কৰিবলগা হোৱা বুলিও মুকলি বিষোদগাৰ কৰা দেখা গৈছে । কাজেই লোকসভা নিৰ্বাচনৰ প্ৰাক মুহূৰ্তত কংগ্ৰেছৰ পৰা এই তিনি নেতাৰ কংগ্ৰেছক বিদায় দি বিজেপি আৰু অগপত যোগদান কৰিবলৈ সাজু হোৱা বাতৰিয়ে নামনি অসমৰ কংগ্ৰেছত যে কিছু প্ৰভাৱ পেলাব সেয়া নিশ্চিত ৷
লগতে পঢ়ক: কা আন্দোলনৰ পৰা লোকসভা নিৰ্বাচন ২০২৪ লৈ: সাংসদ আব্দুল খালেকৰ সৈতে আছুতীয়া সাক্ষাৎকাৰ
