গুৱাহাটী, ২০ জুন : ক'ভিড-১৯ ক পৰাভূত কৰাৰ লক্ষ্যৰে সোমবাৰৰ পৰা ৰাজ্যজুৰি বৰ্ধিত টিকাকৰণ কাৰ্যসূচী আৰম্ভ হ'ব । দৈনিক তিনি লাখ লোকক ক'ভিড ভেকচিন প্ৰদানৰ লক্ষ্য নিৰ্ধাৰণ কৰিছে ৰাজ্য চৰকাৰে । ইতিমধ্যে ইয়াৰ বাবে কেন্দ্ৰৰ সংখ্যা বৃদ্ধি কৰাৰ লগতে দুই হাজাৰ টীম সাজু কৰি তোলা হৈছে । সোমবাৰৰ পৰা ৰাজ্যজুৰি আৰম্ভ হ'ব ভেকচিনৰ বিশাল কাৰ্যসূচী ।
ইয়াৰ বাবে প্ৰতিখন জিলাৰে প্ৰশাসন আৰু স্বাস্থ্য বিভাগক সাজু হোৱাৰ বাবে ইতিমধ্যে নিৰ্দেশ দিছে খোদ মুখ্যমন্ত্রী ডঃ হিমন্ত বিশ্ব শৰ্মাই ৷ সোমবাৰৰ পৰা ১৮ বছৰৰ ঊৰ্দ্ধৰ সকলো লোকেই যিকোনো কেন্দ্ৰত গৈ ভেকচিন ল'ব পাৰিব আৰু ভেকচিন কেন্দ্ৰত গৈ নাম পঞ্জীয়ন কৰাৰো সুবিধা ল'ব পাৰিব । ইয়াৰে বাবে কেন্দ্ৰসমূহত লোক নিয়োগ কৰা হৈছে । ভেকচিন গ্ৰহণৰ ক্ষেত্রত যাতে কোনো লোকে কোনো ধৰণৰ অসুবিধাৰ সন্মুখীন নহয়, তাৰ বাবে চৰকাৰে সকলো ধৰণৰ ব্যৱস্থা গ্ৰহণ কৰিছে ।
উল্লেখযোগ্য যে, ২১ জুনৰ পৰা কেন্দ্ৰই সকলোৰে বাবে ভেকচিন বিনামূলীয়া কৰিছে । পূৰ্বতে ১৮-৪৪ বছৰৰ লোকৰ বাবে অসম চৰকাৰে ভেকচিন ক্ৰয় কৰিবলগীয়া হৈছিল । এতিয়াৰে পৰা কেন্দ্ৰই যোগান ধৰিব সকলো ভেকচিন । যাৰ পৰিপ্ৰেক্ষিতত দৈনিক ভেকচিন ৰাজ্যলৈ প্ৰেৰণ কৰা হৈছে ।
বিগত ২৪ ঘণ্টাত ৰাজ্য চৰকাৰে লাভ কৰিছে দুই লাখ ড'জ ক’ভিশ্বিল্ড আৰু ৩০ হাজাৰ ড'জ ক'ভাক্সিন । বৰ্তমান ৰাজ্য চৰকাৰৰ হাতত মজুত আছে ৭,২৮,৮৬০ ড'জ ভেকচিন । উল্লেখ্য যে, এতিয়ালৈকে ৫৩,২৩,১০১ গৰাকী লোকে ভেকচিন লাভ কৰিবলৈ সক্ষম হৈছে । ইয়াৰে ৪২,৬৭,৮৩৩ গৰাকী লোকে প্ৰথম পালি আৰু ১০,৫৫,২৬৮ গৰাকীয়ে দ্বিতীয় পালি লাভ কৰিছে ।
ইফালে ৰাজ্যখনত এতিয়াও অব্যাহত আছে কৰ'ণাৰ সংক্ৰমণ । বিগত ২৪ ঘণ্টাত ৰাজ্যখনত ১,৬১,৪২০ গৰাকী লোকৰ ক'ভিড টেষ্ট কৰা হৈছিল আৰু ইয়াৰে ৩,৫৭১ গৰাকীৰ দেহত কৰ'ণাৰ উপস্থিতি ধৰা পৰে । সেই হিচাপত আক্ৰান্তৰ হাৰ ২.২১ শতাংশ । এই সময়চোৱাত মৃত্যু হৈছে ৪০ গৰাকী ক'ভিড ৰোগীৰ ।
আনহাতে বিগত ২৪ ঘণ্টাত ক'ভিডৰ পৰা আৰোগ্য লাভ কৰিছে ৫,১৪১ গৰাকী লোকে । আৰোগ্যৰ হাৰ ৯১.৭৭ শতাংশ । বৰ্তমান সময়ত সক্ৰিয় হৈ থকা ক'ভিড ৰোগীৰ সংখ্যা হৈছে ৩৪,০২১ গৰাকী ৷ লক্ষণীয় বিষয় যে গুৱাহাটী মহানগৰীৰ তুলনাত শোণিতপুৰ, তিনিচুকীয়া, গোলাঘাট, নগাঁও, ডিব্ৰুগড় আদি জিলাত ক'ভিড আক্ৰান্ত ৰোগীৰ সংখ্যা ক্ৰমাৎ বৃদ্ধি পাইছে ।
আনহাতে কানাডাৰ পৰা অসমৰ বাবে আহিল ২৭৪ কিল’গ্ৰামৰ ৫০০০ অক্সিজেন কনচেণ্ট্ৰেটৰ । বিমানযোগে অনা এই সামগ্ৰীখিনি শনিবাৰে নিশা প্ৰায় ২.৩০ মান বজাত গুৱাহাটীৰ বৰঝাৰ বিমান বন্দৰত উপস্থিত হয় । অসমে প্ৰথমবাৰৰ বাবে কানাডাৰ পৰা অক্সিজেন কনচেণ্ট্ৰেটৰ লাভ কৰিছে আৰু এইসমূহ কনচেণ্ট্ৰেটৰ গুৱাহাটী, শিলচৰ আৰু কৰিমগঞ্জলৈ প্ৰেৰণ কৰা হ’ব ৷ ৰেডক্ৰছৰ আন্তঃৰাষ্ট্ৰীয় সমিতিৰ উদ্যোগত এই প্ৰয়োজনীয় চিকিৎসা সামগ্ৰীখিনি অসমলৈ অনা হৈছে ৷
লগতে পঢ়কঃ ৰাজ্যত হ্ৰাস পাইছে ক’ভিড আক্ৰান্তৰ সংখ্যা
