গুৱাহাটী,২৫ ফেব্ৰুৱাৰী: যি সময়ত শাসকীয় দল বিজেপিয়ে ৰাজ্যৰ প্ৰতিটো পৰিয়ালৰ পদুলিয়ে পদুলিয়ে উপস্থিত হৈ নিৰ্বাচনী প্ৰচাৰ আৰম্ভ কৰিছে, সেই সময়তে কিন্তু কংগ্ৰেছ-এআইইউডিএফৰ উদ্যোগত গঠিত মহাজোটে সাধাৰণভাবে নিৰ্বাচনী অভিযান চলায়েই ক্ষান্ত থাকিবলগীয়া হৈছে । আসন বুজাবুজি বা মহাজোটৰ ন্যূনতম উমৈহতীয়া কৰ্মসূচী কি হ'ব সেয়াও এই পৰ্যন্ত সাজু কৰিব পৰা নাই বিৰোধী দল কেইটাই ।
কংগ্ৰেছ, এআইইউডিএফ, আঞ্চলিক গণ মৰ্চা আৰু বাওঁদল মিলি যি মহাজোট ইতিমধ্যে বিজেপিক ভেটিবলৈ জন্ম দিয়া হৈছে, সেই মহাজোটৰ কোনো ধৰণৰ ন্যূনতম উমৈহতীয়া কৰ্মসূচী আজিলৈকে সাজু হৈ নুঠিল । ইয়াৰ অন্যতম কাৰণটোৱেই হৈছে কংগ্ৰেছ আৰু এআইইউডিএফৰ মাজত চলি থকা আসন ভাগ বাটোৱাৰাৰ নিমিলা অংক ।
প্ৰদেশ কংগ্ৰেছৰ উপ-সভাপতি দূৰ্গা দাস বড়োৱে ই টি ভি ভাৰতক কয় যে মাৰ্চৰ প্ৰথম ভাগতহে মহাজোটৰ এক ন্যুনতম উমৈহতীয়া কৰ্মসূচী সাজু হৈ উঠাৰ সম্ভাৱনা আছে । কিন্তু বৰ্তমানলৈকে এই ন্যুনতম উমৈহতীয়া কৰ্মসূচীক লৈ কোনো ধৰণৰ আলোচনা বা সিদ্ধান্ত মহাজোটৰ দল কেইটাৰ মাজত আলোচনা হোৱা নাই ।
