গুৱাহাটী, 6 ফেব্ৰুৱাৰী: "সমগ্ৰ বিশ্বই পুৱা যি কাপ চাহেৰে তন্দ্ৰাৰ অৱসাদ দুৰ কৰে, সেইকাপ চাহ যিসকলে কঠোৰ পৰিশ্ৰমেৰে উৎপাদন কৰে তেওঁলোকৰ জীৱনধাৰণৰ মানদণ্ড ওপৰলৈ নিবই লাগিব"৷ এই মন্তব্য দেশৰ বিত্ত মন্ত্ৰী নিৰ্মলা সীতাৰমণৰ ৷ শণিবাৰে গুৱাহাটীত উপস্থিত হোৱা বিত্ত মন্ত্ৰীগৰাকীয়ে খানাপাৰাৰ পশু চিকিৎসা মহাবিদ্যালয় খেলপথাৰত অনুষ্ঠিত "চাহ বাগিচা ধন পুৰস্কাৰ মেলা"ত অংশগ্ৰহণ কৰি এইদৰে মন্তব্য কৰে ৷ উল্লেখযোগ্য যে, এই অনুষ্ঠানত ৰাজ্যৰ 7,46,667 জন চাহ শ্ৰমিকৰ বেংক একাউন্টলৈ চৰকাৰে তিনি হাজাৰ টকাকৈ আগবঢ়োৱা এই আঁচনিখন শুভাৰম্ভ কৰে বিত্ত মন্ত্ৰী সীতাৰমণে ৷
শনিবাৰে প্ৰতীকিভাবে এই অনুষ্ঠানত বিত্ত মন্ত্ৰীগৰাকীয়ে ছয়গৰাকী শ্ৰমিকক নিজ হাতে তিনি হাজাৰকৈ টকাৰ চেক প্ৰদান কৰাৰ বিপৰীতে বাকীসকলৰ একাউন্টলৈ ডিজিটেলী এই ধনৰাশি ট্ৰেঞ্চফাৰ কৰা হয় ৷ অনুষ্ঠানত ভাগ লৈ সীতাৰমণে আৰু কয় যে, ৰাজ্য চৰকাৰৰ অনুৰোধৰ বাবে এইবাৰৰ কেন্দ্ৰীয় বাজেটত চাহ শ্ৰমিকৰ কল্যাণৰ বাবে এহেজাৰ কোটি টকা ধাৰ্য কৰাটো সম্ভৱ হৈছে ৷ চাহ শ্ৰমিকৰ জীৱনধাৰণৰ মান উন্নত কৰাৰ বাবে চৰকাৰ বদ্ধ পৰিকৰ বুলিও তেওঁ ঘোষণা কৰে ৷
অনুষ্ঠানত ভাগ লৈ মুখ্যমন্ত্ৰী সৰ্বানন্দ সোণোৱালে কয় যে, ৰাজ্যৰ চাহ শ্ৰমিকসকলৰ সৰ্বাংগীন কল্যাণৰ বাবে বৰ্তমানৰ চৰকাৰে যি কাম কৰিছে বিগত সত্তৰ বছৰে কোনো এখন চৰকাৰেই সেই কাম কৰা নাছিল ৷ ৰাজ্যত আঠ লক্ষাধিক চাহ শ্ৰমিকৰ বেংক একাউন্ট খুলিবলৈ সক্ষম হোৱাটো এক বিৰল ঘটনা বুলিও মন্তব্য কৰে মুখ্যমন্ত্ৰী সৰ্বানন্দ সোণোৱালে ৷ আনহাতে, উপস্থিত জনতাৰ বিপুল হৰ্ষোল্লাসৰ মাজত ভাষণ দি মন্ত্ৰী ড৹ হিমন্ত বিশ্ব শৰ্মাই কয় যে, এতিয়া চাহ শ্ৰমিক ৰাইজৰ মনত এটাই অলপ দুখবোধ আছে ৷ সেইয়া হ'ল তেওঁলোকৰ দৈনিক মজুৰি বৃদ্ধি ৷ এইয়া তেওঁলোকৰ দীৰ্ঘদিনীয়া দাবী ৷ সেই দাবীও অহা দহ দিনৰ ভিতৰত পূৰণ কৰা হ'ব বুলি উল্লেখ কৰি আগন্তুক দহ দিনৰ ভিতৰত চাহ শ্ৰমিকৰ মজুৰি বৃদ্ধিৰ অধিসূচনা জাৰি কৰা হ'ব বুলি মন্ত্ৰী ড৹ শৰ্মাই শনিবাৰৰ সভাত ঘোষণা কৰে ৷
