গুৱাহাটী, ৫ জুলাই: সভ্য সমাজক লজ্জানত কৰা ডাঃ সংগীতা দত্ত আৰু তেওঁৰ স্বামীৰ কৰ্মই সমগ্ৰ ৰাজ্য জোকাৰি যোৱাত শাস্তিৰ দাবী জনাইছিল বিভিন্ন দল-সংগঠনে । অবৈধভাৱে তুলি লোৱা কন্যা সন্তানক নিৰ্যাতন চলাই গ্ৰেপ্তাৰ হোৱা ডাঃ সংগীতা দত্তই দীৰ্ঘদিন ধৰি তিনি বছৰীয়া তোলনীয়া কন্যাক চলাই আহিছিল নাৰকীয় নিৰ্যাতন । এইবাৰ পিছে তেওঁ নিজৰ মেনেজাৰৰ বিৰুদ্ধেই তুলিলে অভিযোগ । নিজৰ মেনেজাৰৰ বিৰুদ্ধে ষড়যন্ত্ৰৰ অভিযোগ তুলিলে কাৰাবন্দী চিকিৎসক ডাঃ সংগীতা দত্তই । মেনেজাৰ ৰিজু ৰয়েহে ডাঃ সংগীতা দত্তৰ তোলনীয়া সন্তান দুটিক অত্যাচাৰ কৰিছিল । আনকি মেনেজাৰজনে অভিসন্ধিৰে চিকিৎসক দম্পতীক এই সমগ্ৰ কাণ্ডৰ বাবে জগৰীয়া কৰিছিল বুলি আৰক্ষীক অভিযোগ কৰিছে ডাঃ সংগীতা দত্তই । এই সন্দৰ্ভত ডাঃ সংগীতা দত্তই ৩০ জুনত পল্টনবজাৰ থানাত কাৰাগাৰৰ পৰাই এখন এজাহাৰ দাখিল কৰে ।
এজাহাৰখনত তেওঁ অভিযোগ কৰা মতে ,মেনেজাৰ ৰিজু ৰয়ে সম্পত্তিৰ লোভত অভিসন্ধি কৰি তেওঁলোকৰ নাম শিশু নিৰ্যাতনৰ অপৰাধৰ সৈতে সাঙোৰ খুৱাইছিল । অৱশ্য়ে পল্টনবজাৰ আৰক্ষী থানাত এজাহাৰ দাখিল কৰা হৈছে যদিও আৰক্ষীয়ে গোচৰটো পঞ্জীয়ন কৰা নাই বুলি জানিব পৰা গৈছে ।
উল্লেখ্য যে পল্টনবজাৰ আৰক্ষীয়ে সোমবাৰে শিশু নিৰ্যাতনৰ গোচৰ সন্দৰ্ভত চিকিৎসক দম্পতী সংগীতা দত্ত আৰু ৱালিউল ইছলামৰ বিৰুদ্ধে আংশিক অভিযোগনামা দাখিল কৰিছে । চিকিৎসক দম্পতীৰ বিৰুদ্ধে তোলনীয়া দুই সন্তানক উৎপীড়নৰ গুৰুতৰ অভিযোগ উত্থাপিত হৈছে । যাৰ বাবে দুয়োগৰাকী চিকিৎসকক আৰক্ষীয়ে গ্ৰেপ্তাৰ কৰি জেললৈ প্ৰেৰণ কৰিছিল । সম্প্ৰতি চিকিৎসক দম্পতী কাৰাগাৰত বন্দী হৈ আছে । চিকিৎসক দম্পতীয়ে তোলনীয়া দুই সন্তানক কঠোৰ শাস্তি প্ৰদান কৰাৰ লগতে তোলনীয়া কন্যা সন্তানক প্ৰচণ্ড গৰমত ঘৰৰ চাদৰ ওপৰত বান্ধি থোৱা দৃশ্যও সামাজিক মাধ্যমত ভাইৰেল হৈ পৰিছিল ।
উত্থাপিত অভিযোগৰ ভিত্তিত যোৱা ৫ মে'ত দুয়োগৰাকী চিকিৎসকক আৰক্ষীয়ে গ্ৰেপ্তাৰ কৰিছিল । চিকিৎসক দম্পতীয়ে তোলনীয়া সন্তানৰ ওপৰত কৰা অত্যাচাৰৰ তথ্য পোহৰলৈ অহাৰ পাচতে ৰাজ্যজুৰি ব্যাপক প্ৰতিক্ৰিয়াৰ সৃষ্টি হৈছিল । উল্লেখ্য় যে আৰক্ষীৰ তদন্তত নিতৌ পোহৰলৈ আহিছিল শিশু নিৰ্যাতনকাৰী ডাঃ সংগীতা দত্তৰ বহু কাহিনী ৷ ডাঃ সংগীতা দত্তৰ ঘৰৰ চিচিটিভি ফুটেজত চিকিৎসক দম্পতীৰ পাশৱিকতাৰ ভয়ংকৰ তথ্য ওলাই পৰাৰ পিচতেই ৰাজ্য়জুৰি প্ৰতিক্ৰিয়াৰ সৃষ্টি হৈছিল ।
লগতে পঢ়ক:Sangeeta Dutta Case: চিচিটিভি ফুটেজত ওলাইছে চিকিৎসক দম্পতীয়ে চলোৱা আতিশয্যৰ শিহৰণকাৰী দৃশ্য
