নিউজ ডেস্ক, 19 ছেপ্টেম্বৰঃ মুক্তিৰ পূৰ্বেই ৰীমা দাসৰ "বুলবুল কেন চিং" ছবি খনে চলচ্চিত্ৰ জগতত আলোড়নৰ সৃষ্টি কৰিছে ৷ শুকুৰবাৰে ছবি গৃহলৈ আহিব ৰাষ্ট্ৰীয় আন্তঃৰাষ্ট্ৰীয় বহু কেইটা বঁটাৰে সন্মানিত তথা ৰজত কমল বঁটাৰে সন্মানিত ৰীমা দাসৰ চিনেমা "বুলবুল কেন চিং" । কেইবাখনো দেশৰ বিভিন্ন প্ৰতিযোগিতাত অংশ গ্ৰহণ কৰি বুধবাৰে নিশা ছয়গাঁৱৰ নিজ ঘৰত উপস্থিত হয় ৰীমা দাস ।
বৃহস্পতিবাৰে গুৱাহাটী প্ৰেছ ক্লাবত এক সংবাদমেলৰ জৰিয়তে ছবি খনৰ মুক্তিৰ কথা ঘোষণা কৰে ৰীমা দাসে । ভিলেজ ৰকষ্টাৰ যেনেদৰে দৰ্শকে আদৰি লৈছে "বুলবুল কেন চিঙ"কো আদৰি লোৱাৰ বাবে ৰীমা দাসে ৰাইজক আহ্বান জনায় । উল্লেখযোগ্য যে প্ৰায় ৪০ খন প্ৰতিযোগিতাত অংশগ্ৰহণ কৰি ১৩ তাতকৈ অধিক বঁটা লাভ কৰিবলৈ সক্ষম হৈছে বুলবুল কেন চিঙে ৷
তিনি গৰাকী কিশোৰৰ পৰিচয় আৰু তাৰ পাছত হোৱা সংঘাতক মূল বিষয় হিচাপে লৈ নিৰ্মাণ কৰা হৈছে ছবিখন । মুক্তিৰ পূৰ্বে এই ছবিখনে ৬৬ সংখ্যক ৰাষ্ট্ৰীয় চলচ্চিত্ৰ বঁটা প্ৰদান অনুষ্ঠানত চলচ্চিত্ৰখনে " বেষ্ট ফিচাৰ ফিল্ম " বঁটা লাভ কৰাৰ লগতে ৰজতকমল বঁটা লাভ কৰে । ইয়াৰ উপৰিও এই ছবিখনে ইণ্ডিয়ান ফেষ্টিভেল অৱ মেলবৰ্ণত লাভ কৰে "বেষ্ট ইণ্ডি ফিল্ম" বঁটা লাভ কৰে ৷ ছবিখনৰ মূল চৰিত্ৰত অভিনয় কৰিছে অঞ্জলি দাস,বনিতা ঠাকুৰীয়া আৰু মনোৰঞ্জন দাসে । সকলোৱে আশা কৰিছে বুলবুল কেন ছিঙে দৰ্শকৰ যোগাত্মক সঁহাৰি লাভ কৰিব ৷
