গুৱাহাটী, 1 জুলাইঃ প্ৰথম বাৰৰ বাবে ভাৰতত উদ্ধাৰ ' ইস্প্ৰেছড্ টৰটইজ' ৷ দক্ষিণ এছিয়াৰ বিভিন্ন অঞ্চলত দেখিবলৈ পোৱা বিৰল আৰু অতি বিপন্ন প্ৰজাতিৰ 'ইস্প্ৰেছড্ টৰটইজ' প্ৰথম বাৰৰ বাবে উদ্ধাৰ হৈছে ভাৰতত । পোন প্ৰথম বাৰৰ বাবে ভাৰতত এই প্ৰজাতিৰ কাছ উদ্ধাৰ হোৱাত প্ৰকৃতিপ্ৰেমী সকলৰ মাজত বিশেষ চৰ্চা লাভ কৰিছে ।
অৰুণাচলৰ য়াজলিৰ এক ঘনঅৰণ্যত অৰুণাচলৰ বন বিভাগে উদ্ধাৰ কৰিবলৈ সক্ষম হৈছে পৃথিৱীৰ বুকুৰ পৰা প্ৰায় নিঃশেষ হ'বলৈ ধৰা অতি বিপন্ন প্ৰজাতিৰ এটা কাছ । ভাৰতত পূৰ্বে কেতিয়াও দেখিবলৈ নোপোৱা এই বিৰল প্ৰজাতিৰ দুটাকৈ কাছ অৰুণাচলৰ বন বিভাগৰ লোকে য়াজলিত দুজন কিশোৰৰ কবলৰ পৰা উদ্ধাৰ কৰে । 'ইস্প্ৰেছড্ টৰটইজ' নামৰ এই প্ৰজাতিৰ কাছ বিধ সাধাৰণতে দক্ষিণ এছিয়াৰ বিভিন্ন অঞ্চলত দেখিবলৈ পোৱা যায় যদিও ভাৰতত প্ৰথম বাৰৰ বাবে এইবিধ কাছ উদ্ধাৰ হৈছে ৷ ভাৰতৰ চুবৰীয়া দেশ ম্যানমাৰৰ অৰণ্যত এইবিধ কাছৰ প্ৰজাতি পোৱা যায় যদিও অৰুণাচল প্ৰদেশলৈ এই কাছ দুটা কেনেকৈ আহিল সেয়া এতিয়াও বিচাৰ্যৰ বিষয় হৈ আছে । কাছ দুটা য়াজলিৰ ৰেঞ্জাৰ বাণ্টি টাওৰ দৃষ্টি গোচৰ হোৱাত কাছ দুটা উদ্ধাৰ কৰি চিনাক্ত কৰণৰ বাবে কাছ দুটাৰ ফটো চ'ছিয়েল মিডিয়াত শ্বেয়াৰ কৰে ।
আনহাতে, বন্যপ্ৰাণী সংৰক্ষণৰ লগত জড়িত বেচৰকাৰী সংস্থা এটাই কাছ দুটাক চিনাক্তকৰণ কৰে । অৰুণাচলৰ বন বিভাগৰ কবলত থকা এই বিলুপ্ত প্ৰায় কাছবিধ সংৰক্ষণ বাবে অৰুণাচলৰ চৰকাৰ আৰু বন বিভাগে কেনে পদক্ষেপ গ্ৰহণ কৰে সেয়া লক্ষণীয় ৷
