গুৱাহাটী,৯ জুনঃ দেওবাৰে গুৱাহাটী প্ৰেছ ক্লাবত উন্মোচন হয় পুলিন ডেকাৰ দ্বাৰা ৰচিত 'আলোড়িত স্বপ্নৰ ছাঁ-পোহৰ' শীৰ্ষক এখনি গল্প পুথি । গ্ৰন্থখন আনুষ্ঠানিকভাৱে উন্মোচন কৰে মুখ্যমন্ত্ৰীৰ মিডিয়া উপদেষ্টা হৃষীকেশ গোস্বামীয়ে । বাস্তৱ জীৱনৰ বিভিন্ন অভিজ্ঞতাৰ ভিত্তিত লিখা গল্পসমূহ পাঠকে আদৰি ল'ব বুলি আশা ব্যক্ত কৰে উন্মোচকে ৷
উল্লেখ্য যে লেখক পুলিন ডেকা পূৰ্বে সংবাদ মাধ্যমৰ সৈতে প্ৰত্যক্ষভাৱে জড়িত থকাৰ বিপৰীতে বৰ্তমান তথ্য আৰু জনসংযোগ বিভাগৰ উপ সঞ্চালক পদত কাৰ্যনিৰ্বাহ কৰি আহিছে । লগতে মুখ্যমন্ত্ৰীৰ মিডিয়া কোষৰ দায়িত্বও পালন কৰি আহিছে ডেকাই । মুখ্যমন্ত্ৰীৰ কাৰ্যালয়ৰ দৰে অতি গুৰুত্বপূৰ্ণ বিভাগৰ কৰ্মময় ব্যস্ততাৰ মাজতো সাহিত্য চৰ্চা অব্যাহত ৰাখিছে ডেকাই । গ্ৰন্থ উন্মোচনী সভাত বিশিষ্ট অতিথি হিচাপে উপস্থিত থাকে মুখ্য মন্ত্ৰীৰ আইন উপদেষ্টা শান্তনু ভৰালী, গৃহ বিভাগৰ অতিৰিক্ত মুখ্য সচিব কুমাৰ সঞ্জয় কৃষ্ণকে ধৰি কেইবাগৰাকীও বিশিষ্ট ব্যক্তি ৷
