মহানগৰীত কেমেৰাত বন্দী বাইক চুৰিৰ দৃশ্য

দিনদুপৰতে গুৱাহাটী মহানগৰীৰ পৰা চুৰি হয় এখন বাইক ৷ চিচিটিভিত বন্দী চুৰিকাণ্ডৰ চাঞ্চল্যকৰ দৃশ্য ৷

গুৱাহাটী, 17 জুলাইঃ গুৱাহাটী মহানগৰীৰ পৰা দিন দুপৰতে চুৰি বাইক ৷ বাইকত অহা চোৰে অতি কৌশলেৰে চুৰি কৰি নিয়ে এখন বাইক ৷ মহানগৰীৰ 37নং ৰাষ্ট্ৰীয় ঘাইপথৰ দাঁতিত থকা মহিন্দ্ৰা শ্ব'ৰুমৰ পাৰ্কিঙৰ পৰাই চোৰে চুৰি কৰি নিয়ে নয়নমণি দাস নামৰ যুৱকজনৰ ৰয়েল এনফিল্ড বাইকখন ৷ ঘটনাৰ সমগ্ৰ দৃশ্য শ্ব'ৰুমৰ বাহিৰত সংস্থাপিত চিচিটিভি কেমেৰাত বন্দী হৈ ৰয় ৷

ঘটনা সন্দৰ্ভত গড়চুক আৰক্ষী থানাত এজাহাৰ দাখিল কৰিছে বাইকৰ গৰাকীয়ে ৷ উল্লেখ্য যে দুমাহ পূৰ্বে একেস্থানৰ পৰাই চুৰি হৈছিল এখন পালছাৰ বাইক ৷ আৰক্ষীয়ে উক্ত ঘটনাত জড়িত চোৰক কৰায়ত্ব কৰিবলৈ সক্ষম হৈছিল যদিও আজিলৈকে উদ্ধাৰ কৰিবলৈ সক্ষম নহ'ল বাইকখন ৷ মহানগৰীত দিনক দিনে বৃদ্ধি পোৱা চুৰিকাণ্ডক লৈ এতিয়া শংকিত হৈ পৰিছে সাধাৰণ জনতা ৷ আনহাতে ভুক্তভোগী বাইকৰ গৰাকীয়ে ঘটনা সন্দৰ্ভত আৰক্ষীৰ ভূমিকাও সন্দেহজনক বুলি উল্লেখ কৰিছে ৷