গুৱাহাটী, ৬ মে': কৰ'ণা বিভীষিকা, লক ডাউন, অৰ্থনৈতিক সংকট এই সকলোবিলাকৰ মাজেৰে চলি আছে সমষ্টি পুনৰ নিৰ্ধাৰণৰ কোচকাৱাজ । অসমত সমষ্টি পুনৰ নিৰ্ধাৰণৰ বাবে গঠন হ'বলগীয়া বিশেষ সমিতিখনত চূড়ান্ত অনুমোদন জনাব ভাৰতবৰ্ষৰ সমষ্টি পুনৰ নিৰ্ধাৰণ আয়োগে । সেই সমিতিত থাকিব লাগিব অসমৰ সকলো ৰাজনৈতিক দলৰ পাঁচজনকৈ সাংসদ আৰু পাঁচজনকৈ বিধায়ক । সেই অনুসৰি বুধবাৰে বিধানসভা সচিবালয়ে সমষ্টি পুনৰ নিৰ্ধাৰণ আয়োগলৈ অনুমোদনৰ বাবে প্ৰেৰণ কৰে পাঁচজনীয়া বিধায়কৰ তালিকা ।
এই তালিকাত অন্তৰ্ভুক্ত হোৱা বিধায়ক পাঁচগৰাকী হ'ল বিজেপিৰ মৃণাল শইকীয়া, কংগ্ৰেছৰ কমলাক্ষ্য দেৱ পুৰকায়স্থ, অগপৰ ৰমেন্দ্ৰ নাৰায়ণ কলিতা, বি পি এফৰ ৰবিৰাম নাৰ্জাৰী আৰু এ আই ইউ ডি এফৰ হাফিজ বছিৰ আহমেদ কাছিমী । একেদৰে লোকসভা সচিবালয়েও অসমৰ পাঁচগৰাকী সাংসদৰ নাম সমষ্টি পুনৰ নিৰ্ধাৰণ আয়োগলৈ প্ৰেৰণ কৰিব লাগিব ।
