গুৱাহাটী, ১৬ অক্টোবৰ : এ পি ডি চি এলৰ নিযুক্তি কেলেংকাৰীত আৰু বহুতো ৰৌ-বৰালী জালত পৰাৰ সম্ভাৱনাই দেখা দিছে । ইতিমধ্যে মুখ্যমন্ত্ৰীৰ তদাৰকী কোষে এই কেলেংকাৰীত জড়িত কেইবাজনো উচ্চ পদস্থ বিষয়া আৰু মধ্যস্থতাকাৰীক গ্ৰেপ্তাৰ কৰাৰ পিছত এইবাৰ পুনৰ সাজু হৈছে প্ৰায় শতাধিক প্ৰাৰ্থীক জেৰা কৰাৰ বাবে ।
প্ৰাপ্ত তথ্য মতে, মুখ্যমন্ত্ৰীৰ তদাৰকী কোষে ইতিমধ্যে এই কেলেংকাৰীৰ তদন্ত আগবঢ়াই নিবলৈ অধিক তথ্য আহৰণৰ বাবে ২৭৮ গৰাকী প্ৰাৰ্থীক জেৰা কৰিবলৈ তালিকা প্ৰস্তুত কৰিছে । ইয়াৰে ১২৪ গৰাকী প্ৰাৰ্থীক ইতিমধ্যে জেৰা সম্পূৰ্ণ কৰা হৈছে ৷ ১৮ অক্টোবৰৰ পৰা পুনৰ বাকী প্ৰাৰ্থী সকলক জেৰা কৰা হ’ব ।
মনকৰিবলগীয়া যে, বহুকেইগৰাকী প্ৰাৰ্থীও এই কেলেংকাৰীৰ সৈতে পোনপটীয়াকৈ জড়িত থকাৰ তথ্য লাভ কৰিছিল মুখ্যমন্ত্ৰীৰ তদাৰকী কোষে । তদন্তত এই তথ্যও ওলাই পৰিছিল যে একাংশ প্ৰাৰ্থীয়ে চাকৰিৰ বাবে চাৰিৰ পৰা পাঁচ লাখ টকা পৰ্যন্ত উৎকোচ দিছিল ৷ লগতে চাকৰিটো নিশ্চিত হোৱাৰ পিছত আৰু দুই তিনি লাখ টকা আদায় দিয়াৰ কথা আছিল প্ৰাৰ্থী সকলে ।
লগতে পঢ়ক: APDCL কেলেংকাৰী : অভিযুক্তক জেৰা অব্যাহত ৰাখিছে মুখ্যমন্ত্ৰী তদাৰকী কোষে
