গুৱাহাটী, ৫ জানুৱাৰী: ২০২৩ চনৰ শেষৰ ফালে মুক্তি লাভ কৰিছিল ‘ৰঙাটাপু ১৯৮২’ ৷ ২০২৩ চনত বহুকেইখন ছবি সফল হৈছিল আৰু ইয়াৰ ভিতৰত অন্যতম সফল ছবি হৈছে ‘ৰঙাটাপু ১৯৮২’ ৷ অসম বুৰঞ্জীৰ বুকুৰ পৰা লোৱা এটা কাহিনীক আধাৰ হিচাপে লোৱা ছবিখন দৰ্শকৰ মাজত বিশেষ ভাৱে সমাদৰ লাভ কৰিবলৈ সক্ষম হৈছিল ৷ কিন্তু মনকৰিবলগীয়া কথা যে এই ছবিখন কোনো অভিজ্ঞ লোকৰ দ্বাৰা পৰিচালিত নহয়, অভিজ্ঞ নথকা বুলি এই কাৰণেই কৈছো, কিয়নো এই ছবিখন পৰিচালনা কৰিছে ন পৰিচালক আদিত্যম শইকীয়া ৷ আদিত্যম শইকীয়াৰ এয়া আছিল প্ৰথমখন ছবি ৷ কিন্তু পৰিচালকগৰাকীৰ প্ৰথম ছবিখনেই আছিল অতি সফল ৷
এতিয়া ৰঙাটাপুৰ সফলতাৰ পাচত শীঘ্ৰেই আহি আছে আদিত্যম শইকীয়াৰ দ্বিতীয়খন ছবি "The Black Umbrella" । ২০২৪ বৰ্ষৰ আৰম্ভণিতে সামাজিক মাধ্যমযোগে এই কথা ঘোষণা কৰে পৰিচালক আদিত্যম শইকীয়াই । উল্লেখযোগ্য যে বিগত ২০২৩ বৰ্ষত মুক্তিপ্ৰাপ্ত "ৰঙাটাপু ১৯৮২" ছবিখনে যি জনপ্ৰিয়তা আৰু সমাদৰ লাভ কৰিলে তাৰ পিচতে আচলতে এগৰাকী পৰিচালক হিচাবে আদিত্যম শইকীয়াৰ নিপুণতা যথেষ্ট প্ৰকাশ পাইছে, তেখেতৰ ওপৰত দৰ্শকৰ বিশ্বাসো বাঢ়িছে ।
ইফালে ফেচবুক পোষ্ট যোগে আদিত্যম শইকীয়াই তেওঁৰ আহিবলগীয়া ছবি "The Black Umbrella" ৰ ফাৰ্ষ্ট লুক পোষ্টাৰ মুকলি কৰে । লগতে তেওঁ পোষ্ট কৰি উল্লেখ কৰে,‘‘ সকলোলৈ ইংৰাজী নতুন বছৰৰ ওলগ জনালো । নতুন বছৰৰ এই প্ৰথম দিনটোতেই আপোনালোকক জনাৱ বিচাৰিছো এটা ভাল খৱৰ । পাৰচেলিয়া প্ৰডাকচনৰ প্ৰথম নিৱেদন তথা মোৰ দ্বিতীয়খন ছবি ‘‘The Black Umbrella’’ এই বছৰতে আপোনালোকৰ মাজলৈ লৈ আহিম । আৰ্শীবাদ কৰিব ৷ ’’
ছবিখনৰ মুখ্য চৰিত্ৰত অভিনেত্ৰী চুমি বৰাই অভিনয় কৰিব বুলি ইতিমধ্যে এক সূত্ৰৰ পৰা খবৰ পোৱা গৈছে । কিয়নো বিগত দিন ধৰি আদিত্যম শইকীয়া তথা উক্ত ছবিখনৰ মুখ্য চৰিত্ৰত অভিনীত অভিনেত্ৰী চুমি বৰাৰ সামাজিক মাধ্যমৰ বহু পোষ্ট ডুবাইৰ দেখিবলৈ পোৱা গৈছিল ।
লগতে পঢ়ক: নতুন অসমীয়া ছবি অভিমন্যু; কোন কোন এই ছবিত কৰিব অভিনয় ?
