গুৱাহাটী, 31 অক্টোবৰ: আজি ৰাষ্ট্ৰীয় একতা দিৱস (National Unity Day 2022) ৷ চৰ্দাৰ বল্লভভাই পেটেলক শ্ৰদ্ধাঞ্জলি জ্ঞাপন কৰাৰ অৰ্থে ভাৰত চৰকাৰে ২০১৪ চনৰ পৰা আয়োজন কৰি আহিছে এই দিৱস । চৰ্দাৰ বল্লভভাই পেটেলৰ জন্ম জয়ন্তীৰ লগত সংগতি ৰাখি প্ৰতি বছৰে 31 অক্টোবৰত অৰ্থাৎ আজিৰ দিনটোত পালন কৰা হয় ৰাষ্ট্ৰীয় একতা দিৱস ।
স্বাধীন ভাৰতৰ প্ৰাক্তন উপ-প্ৰধানমন্ত্ৰী তথা প্ৰথমগৰাকী গৃহমন্ত্ৰী চৰ্দাৰ বল্লভভাই পেটেলৰ জন্ম দিনৰ লগত সংগতি ৰাখি কেন্দ্ৰীয় আয়োজিত কাৰ্যসূচীত পেটেলৰ প্ৰতিমূৰ্তিত মাল্যাৰ্পণ কৰিলে দেশৰ প্ৰধানমন্ত্ৰী নৰেন্দ্ৰ মোডীয়ে ৷ দেশৰ অন্যান্য প্ৰান্তৰ সমান্তৰালকৈ অসমতো পালন কৰা হয় ৰাষ্ট্ৰীয় একতা দিৱস ৷
দিৱসৰ লগত সংগতি ৰাখি পুৱা গুৱাহাটীৰ নেহেৰু ষ্টেডিয়ামৰ পৰা বাহিৰ কৰা একতাৰ বাবে দৌৰ শীৰ্ষক এটা ৰেলী য’ত উপস্থিত থাকে ৰাজ্যৰ মুখ্যমন্ত্ৰী হিমন্ত বিশ্ব শৰ্মাৰ লগতে কেন্দ্ৰীয় মন্ত্ৰী সৰ্বানন্দ সোণোৱাল ৷ ৰাজ্য চৰকাৰৰ উদ্যোগত নেহেৰু ষ্টেডিয়ামত আয়োজিত একতাৰ দৌৰৰ এই অনুষ্ঠানত অসম আৰক্ষীৰ কেইবাটাও বেটেলিয়ানৰ লগতে মহানগৰীৰ কেইবাখনো বিদ্যালয়-মহাবিদ্যালয়ৰ ছাত্ৰ ছাত্ৰী আৰু সাধাৰণ জনতাই অংশ গ্ৰহণ কৰে (Run of Unity on the occasion of National Unity Day) ।
পতাকা উৰুৱাই একতাৰ দৌৰৰ ফ্লেগ অফ কৰে অসমৰ মুখ্যমন্ত্ৰী ড৹ হিমন্ত বিশ্ব শৰ্মা আৰু কেন্দ্ৰীয় মন্ত্ৰী সৰ্বানন্দ সোনোৱালে । কাৰ্যসূচীৰ উদ্বোধন কৰি মুখ্যমন্ত্ৰী ড৹ হিমন্ত বিশ্ব শৰ্মাই প্ৰদান কৰা ভাষণত চৰ্দাৰ বল্লভভাই পেটেলৰ জীৱন, কৰ্মৰাজী আৰু তেওঁ দেশৰ প্ৰতি আগবঢ়াই যোৱা অৱদানৰ বিষয়ে উল্লেখ কৰে ।
লগতে পঢ়ক : Run for unity: টীয়কত ৰাষ্ট্ৰীয় একতা দিৱস পালন
লগতে তেওঁ কয় যে, চৰ্দাৰ বল্লভভাই পেটেল এগৰাকী স্পষ্টবাদী, সততা তথা ব্যক্তিত্বসম্পন্ন এগৰাকী আত্মবিশ্বাসী ব্যক্তি আছিল । তেওঁ আধুনিক ভাৰত নিৰ্মাণৰ সপোন বাস্তবায়িত কৰাৰ বাবে দেখুওৱা আদৰ্শ আজিও অধিক প্ৰাসংগিক হৈ আছে ।
চৰ্দাৰ বল্লভভাই পেটেলৰ জন্ম জয়ন্তী উপলক্ষে আয়োজিত একতাৰ বাবে দৌৰ ৰাজ্যৰ প্ৰতিখন জিলাৰ ১০০ টাকৈ স্থানত আয়োজন কৰা হৈছে । ৰাজ্যত মুঠ ৩৫০০ স্থানত একতাৰ দৌৰৰ এই কাৰ্যসূচী আয়োজিত কৰা হৈছে বুলি মুখ্যমন্ত্ৰীগৰাকীয়ে কয় ।
মুখ্যমন্ত্ৰীয়ে তেখেতৰ ভাষণৰ মাজতে ৰাজ্যৰ প্ৰাক্তন মুখ্যমন্ত্ৰী তথা বৰ্তমানৰ কেন্দ্ৰীয় মন্ত্ৰী সৰ্বানন্দ সোণোৱালৰ জন্মদিনৰো শুভেচ্ছা জ্ঞাপন কৰিবলৈ সকলোকে আহ্বান জনায় । লগতে একতা দৌৰত অংশগ্ৰহণ কৰা প্ৰতিগৰাকী লোকক ৰাষ্ট্ৰীয় একতা দিৱসৰ শপত বাক্য পাঠ কৰোৱাই মুখ্যমন্ত্ৰী হিমন্ত বিশ্ব শৰ্মাই ।
উল্লেখ্য যে, নেহেৰু ষ্টেডিয়ামৰ পৰা উলিওৱা এই একতাৰ দৌৰ দীঘলী পুখুৰী হৈ পুনৰ নেহেৰু ষ্টেডিয়ামত সামৰণি পৰে ।
লগতে পঢ়ক : Run for unity : বৰপেটাত পালন ৰাষ্ট্ৰীয় একতা দিৱস
