গুৱাহাটী, ১৩ ফেব্ৰুৱাৰীঃ নিৰ্বাচনৰ দিন চমু চাপি অহাৰ লগে লগে অসমলৈ বিভিন্ন ৰাষ্ট্ৰীয় ৰাজনৈতিক দলৰ নেতাৰ আগমন ক্ৰমাৎ তীব্ৰ হ’বলৈ আৰম্ভ কৰিছে । কিছুদিন পূৰ্বে প্ৰধানমন্ত্ৰী নৰেন্দ্ৰ মোডীয়ে শিৱসাগৰ আৰু ঢেকিয়াজুলিত দুখনকৈ সভাত ভাগ লৈ যোৱা এমাহ নৌহঁওতেই পুনৰ অসমলৈ অহাৰ প্ৰস্তুতি চলিছে প্ৰধানমন্ত্ৰী নৰেন্দ্ৰ মোডীৰ ।
মোডীৰ পৰৱৰ্তী লক্ষ্য মাজুলী আৰু চিলাপথাৰ । 22 ফেব্ৰুৱাৰীত প্ৰধানমন্ত্ৰীয়ে মাজুলী আৰু চিলাপথাৰত দুখনকৈ বিশাল সভাত ভাগ ল’ব । একেদৰে পিছ পৰি থকা নাই বিৰোধী কংগ্ৰেছ দলো । 14 ফেব্ৰুৱাৰীত শিৱসাগৰলৈ আহিব কংগ্ৰেছ নেতা ৰাহুল গান্ধী ৷ শিৱসাগৰৰ ব'ৰ্ডিং ফিল্ডত এখন সভাত সেইদিনাই অংশ ল’ব কংগ্ৰেছ যুৱৰাজগৰাকীয়ে । কেৱল সিমানেই নহয়, বৰাক উপত্যকা আৰু উত্তৰ অসমৰো দুখন ঠাইত তেওঁ দুখনকৈ সভাত ভাগ লোৱাৰ কথা জানিব পৰা গৈছে ৷
