গুৱাহাটী,২৫ নৱেম্বৰ : অসম-মেঘালয় সীমান্তত সংঘটিত হোৱা ঘটনাক কেন্দ্ৰ কৰি সৃষ্টি হোৱা উত্তেজনাই সম্প্ৰতি ভয়াৱহ ৰূপ ধাৰণ কৰিছে (Tense situation in Meghalaya)। পশ্চিম কাৰ্বি আংলং জিলাৰ অসম-মেঘালয় সীমান্তৰ মুক্ৰ'ত মঙলবাৰে সংঘটিত হোৱা ঘটনাক লৈ জ্বলিছে মেঘালয় । মঙলবাৰে সংঘটিত হোৱা ঘটনাত অসমৰ এজন বনৰক্ষী আৰু ৫ গৰাকী খাচী লোকৰ মৃত্যু হৈছিল (Mukro firing incident)। এই ঘটনাটোক কেন্দ্ৰ কৰি এতিয়া মেঘালয় ৰাজ্য অগ্নিগৰ্ভা হৈ পৰিছে ।
বিশেষকৈ মেঘালয়ৰ ৰাজধানী শ্বিলঙত অসমৰ বাহনৰ লগতে অসমৰ লোকক আক্ৰমণ কৰা ঘটনা সংঘটিত হৈছে । মঙলবাৰে ঘটনাৰ দিনটোত নিশাৰ ভাগত শ্বিলঙত অসমৰ এখন বাহন জ্বলাই দিয়া হৈছিল । ইয়াৰ পাছত বিগত কেইদিনত অসমৰ কেইবাখনো বাহনত অগ্নি সংযোগ কৰাৰ লগতে আক্ৰমণ চলোৱা হৈছে । অসমৰ পঞ্জীয়নৰ বাহন দেখিলেও খাচী লোকে আক্ৰমণ কৰে (Violence in Assam Meghalaya Border)।
মেঘালয়ৰ প্ৰান্তে প্ৰান্তে অসমৰ বহু বাহনৰ ওপৰত আক্ৰমণ চলোৱা হৈছে । তদুপৰি অসমৰ লোকক প্ৰাণে মৰাৰো ভাবুকি দিছে খাচী দুৰ্বৃত্তই । প্ৰাণৰ মমতাত মেঘালয় এৰিছে অসমৰ বহু লোকে । এতিয়াও অসমৰ বহু লোক আবদ্ধ হৈ আছে শ্বিলঙৰ হোটেলত ।
ইফালে মঙলবাৰৰ পৰাই অসমৰ লোকসকলক মেঘালয়লৈ যোৱাৰ ক্ষেত্রত অসম আৰক্ষীয়ে বাধা প্ৰদান কৰিছে । যাৰ ফলত বহু লোকে মেঘালয়লৈ যাব পৰা নাই । কেৱল অসমৰ লোকেই নহয় দেশৰ বিভিন্ন প্ৰান্তৰ লগতে বিদেশৰ লোকো গুৱাহাটীত আবদ্ধ হৈ পৰিছে । আজি চতুৰ্থ দিনাও গুৱাহাটীৰ খানাপাৰা আৰু যোৰাবাটত মেঘালয় অভিমুখে যোৱা অসমৰ বাহন আৰু অসমৰ লোকসকলক ঘূৰাই পঠিওৱা হৈছে । ফলত বহু লোক আবদ্ধ হৈ পৰিছে ।
ইফালে মেঘালয়লৈ যাবলগীয়া বহু লোকে গুৱাহাটীতে অৱস্থান কৰিবলগীয়া হৈছে । আনহাতে পৰিস্থিতি বিষম দেখি অসমৰ বহু লোক শ্বিলঙৰ পৰা উভতি আহিছে । অসমৰ পঞ্জীয়নকৃত বহু বাহন আবদ্ধ হৈ আছে শ্বিলঙত । বিশেষকৈ পৰ্যটকসহ অসমৰ বহু বাহন শ্বিলঙত আবদ্ধ হৈ আছে (People from Assam stranded in Shillong)। ইফালে শ্বিলঙত অসমৰ চালকক হাৰাশাস্তি কৰাৰো খবৰ পোৱা গৈছে ।
শ্বিলঙত হাৰাশাস্তিৰ সন্মুখীন হৈছে বহু কেব চালক আৰু পৰ্যটক । বহু পৰ্যটকে শংকাৰ মাজেৰে শ্বিলঙৰ পৰা গুৱাহাটীলৈ আহি তেওঁলোকৰ লগত হোৱা হাৰাশাস্তিৰ কথা বৰ্ণনা কৰিছে । জানিব পৰা মতে শ্বিলঙত এতিয়াও বহু পৰ্যটক আৰু অসমৰ বহু বাহন আৰু চালক আবদ্ধ হৈ আছে । প্ৰায় ডেৰশ-দুশ বাহন তাত আবদ্ধ হৈ আছে ।
শ্বিলঙৰ পৰা অহা একাংশ চালকে জনোৱা মতে বৰ্তমানলৈকে মেঘালয়ত অসমৰ বহুকেইখন বাহন জ্বলাই দিয়া হৈছে । বৰ্তমান শ্বিলঙত ভয় শংকাৰ মাজত আছে বহু পৰ্যটক । অসম-মেঘালয় সীমান্তৰ জিৰিকিণ্ডিঙৰ মুক্ৰ'ত আৰক্ষীৰ গুলীত ৫ জনকৈ খাচী দুর্বৃত্ত নিহত হোৱা ঘটনাই পাহাৰীয়া ৰাজ্যখনৰ পৰিৱেশ অধিক ভয়াৱহ কৰি তুলিছে । স্পর্শকাতৰ পৰিৱেশৰ প্ৰতি লক্ষ্য ৰাখি বৰাকতো মেঘালয়লৈ যোৱা বাহনত বাধা আৰোপ কৰিছে আৰক্ষীয়ে ।
এনে পৰিস্থিতিত অসম-মেঘালয় সীমান্তৰ দীঘৰখালত আবদ্ধ হৈ পৰিছে শ শ ট্রাক । বিগত চাৰিদিনত মেঘালয়ৰ পৰিস্থিতিৰ অধিক অৱনতি ঘটিছে । সীমান্তৰ ঘটনাৰ প্ৰতিবাদত বৃহস্পতিবাৰে সন্ধিয়া শ্বিলঙৰ ৰাজপথত ৫ টাকৈ সংগঠনে প্রতিবাদী সমদল বাহিৰ কৰিছে । শ্বিলঙৰ চিভিল হাস্পতালৰ সমীপত মমবাতি জ্বলাই প্রতিবাদ সাব্যস্ত কৰাৰ সময়তে একাংশ উগ্ৰ প্রতিবাদকাৰীয়ে ৰাজপথত এখন মিনি বাছত অগ্নিসংযোগ কৰি গ্লাছ ভাঙি দিয়াৰ লগতে এটা ট্রেফিক বুথ ভাঙি লণ্ড-ভণ্ড কৰি অগ্নিসংযোগ কৰে ।
আনকি উগ্র প্রতিবাদকাৰীসকলে আৰক্ষীলৈ লক্ষ্য কৰি পেট্ৰ'ল বোমাও নিক্ষেপ কৰে । ফলত প্রতিবাদকাৰীক ছত্ৰভংগ দিয়াৰ বাবে আৰক্ষীয়ে কন্দুৱা গেছ আৰু ৰাবাৰ গুলী নিক্ষেপ কৰাত বহু লোক আঘাতপ্রাপ্ত হয় । এই ঘটনাৰ পাছতেই সমগ্র শ্বিলঙতে উত্তেজনাই বিৰাজ কৰিছে । প্রয়োজন সাপেক্ষে শ্বিলঙত কার্ফিউ ঘোষণা কৰিব বুলিও আৰক্ষীয়ে প্ৰকাশ কৰিছে ।
ইফালে সীমান্তৰ ঘটনাৰ দিনাৰে পৰা শ্বিলঙৰ দোকান বজাৰ তথা কাৰ্যালয় সকলো অঘোষিত বন্ধ হৈ আছে । আনহাতে ৰাজ্যখনৰ শেহতীয়া পৰিস্থিতিৰ বাবে ৭ খন জিলাৰ মোবাইল ইণ্টাৰনেট সেৱা আৰু ৪৮ ঘণ্টাৰ বাবে বন্ধ ৰখা হৈছে (Internet service closed in parts of Meghalaya)। অগ্নিগৰ্ভা মেঘালয়ত এতিয়া ইন্ধনৰ নাটনিয়ে দেখা দিছে । ইন্ধনৰ বাহনত আক্ৰমণ হোৱাৰ পাছতে বৃহস্পতিবাৰে অসম পেট্ৰ'লিয়াম মজদুৰ ইউনিয়নে অসমৰ পৰা মেঘালয়লৈ ইন্ধন পৰিবহন বন্ধ কৰি দিছে । অৱশ্যে মেঘালয় চৰকাৰে অসমৰ পেট্ৰ'লিয়াম পৰিবহনকাৰীসকলক সুৰক্ষা প্ৰদানৰ আশ্বাস দিছে ।
ইফালে বৃহস্পতিবাৰে নিশা মেঘালয়ৰ মুখ্যমন্ত্ৰী কনৰাড চাংমাই কেন্দ্ৰীয় গৃহ মন্ত্ৰী অমিত শ্বাহক সাক্ষাৎ কৰি মুক্ৰ' কাণ্ড সন্দৰ্ভত অৱগত কৰে । তেওঁ সীমান্তত অসম আৰক্ষীৰ গুলীচালনাৰ ঘটনাৰ তদন্ত চি বি আইক দিয়াৰ বাবে অনুৰোধ জনায় । লক্ষণীয় বিষয় যে অসমৰ মুখ্যমন্ত্রী ড৹ হিমন্ত বিশ্ব শৰ্মাইয়ো ঘটনাৰ চি বি আই তদন্ত বিচাৰিছে ।
লগতে পঢ়ক :Assam Meghalaya Border Firing: মেঘালয়ৰ ওচৰত শৰণাপন্ন হৈছে অসম চৰকাৰ: এতুৱা মুণ্ডা
