গুৱাহাটী, 16 চেপ্তেম্বৰঃ দুৰ্গা পূজা সমাগত । দেৱী দুৰ্গাক আদৰাৰ বাবে ৰাজ্য জুৰি এতিয়া চলিছে ব্যাপক প্ৰস্তুতি । কিন্তু ইয়াৰ মাজতে মহানগৰীৰ নুনমাটি দুৰ্গা পূজা সমিতিয়ে হাতত লৈছে প্ৰশংসনীয় পদক্ষেপ ৷ ভয়াবহ প্ৰদূষণৰ প্ৰতি লক্ষ্য ৰাখি নুনমাটি দুৰ্গা পূজা সমিতিয়ে স্থাপন কৰিব মাৰ্বলৰ মূৰ্তি ৷ কিয়নো মাটিৰ প্ৰতিমা নদীত বিসৰ্জন দিয়াৰ ফলত মূৰ্তিৰ ৰঙে নদীৰ পানী প্ৰদূষিত কৰে ৷ সেয়ে স্থায়ী ভাবে প্ৰতিমা স্থাপনৰ সিদ্ধান্ত গ্ৰহণ কৰিছে নুনমাটি দুৰ্গা পূজা সমিতিয়ে ৷
নুনমাটি দুৰ্গা পূজা সমিতিৰ এই সিদ্ধান্তক আদৰণি জনাই মাৰ্বলৰ প্ৰতিমা দান কৰিছে ব্ৰজেন বড়ো নামৰ এজন লোকে । এই মাৰ্বলৰ প্ৰতিমা প্ৰথমে ৰাজস্থানত নিৰ্মাণ কৰা হৈছিল আৰু তাৰ পাছত কলিকতালৈ আনি ৰং কৰা হৈছে বুলি জানিবলৈ দিয়ে সমিতিয়ে । প্ৰায় ৮০০ কিলোগ্ৰাম ওজনৰ প্ৰতিমাত খৰচ হৈছে মুঠ ৮ লাখ টকা ।
ইফালে পূজাৰ দিন চমু চাপি অহাৰ লগে লগে মহানগৰীৰ বিভিন্ন প্ৰান্তত ব্যস্ত হৈ পৰিছে মহিলা মৃণ্ময় শিল্পী সকল ৷ মৃণ্ময় মূৰ্তি নিৰ্মাণৰ জৰিয়তে এই মহিলা শিল্পী সকলে নিজে আত্মনিৰ্ভৰশীল হোৱাৰ লগতে পৰিয়ালৰ ভৰণ পোষণৰ দায়িত্বও পালন কৰি আহিছে ৷
