গুৱাহাটী, ১০ ফেব্ৰুৱাৰী : জীৱন নাটৰ সামৰণি মাৰি অৱশেষত চিতাৰ জুইত বিলীন হৈ অনন্তধামলৈ যাত্ৰা কৰিলে অসমীয়া সংগীত জগতত এক নিজস্ব সুকীয়া ধাৰাৰ সৃষ্টি কৰা অপূৰ্ব বেজবৰুৱাই । বৃহস্পতিবাৰে গুৱাহাটীৰ নৱগ্ৰহ শ্মশানত বিশিষ্ট শিল্পীগৰাকীৰ শেষকৃত্য সম্পন্ন কৰা হয়(Last Rites of Apurba Bezbaruah) ।
অনেক গুণমুগ্ধ, আত্মীয় আৰু কেইবাগৰাকীও শিল্পীৰ উপস্থিতিত অসমীয়া বিহুসুৰীয়া গীতৰ এটা নতুন ধাৰাৰ সৃষ্টি কৰা এইগৰাকী শিল্পীৰ অন্তিম শয়নত তেওঁৰ কনিষ্ঠা কন্যা ইলোৰা বেজবৰুৱাই মুখাগ্নি কৰি পিতৃক শেষ বিদায় জনায় ।
আনহাতে, ৰাজ্য চৰকাৰৰ ফালৰ পৰা শিল্পীগৰাকীক নৱগ্ৰহ শ্মশানত অন্তিম শ্ৰদ্ধা জনাই সাংস্কৃতিক পৰিক্ৰমা বিভাগৰ মন্ত্ৰী বিমল বৰাই । বুধবাৰে সন্ধিয়া গুৱাহাটীৰ এখন ব্যক্তিগত হাস্পতালত শেষ নিশ্বাস ত্যাগ কৰা অপূৰ্ব বেজবৰুৱাৰ(Apurba Bezbaruah passes away) নশ্বৰদেহ বৃহস্পতিবাৰে পুৱা হাস্পতালৰ পৰা লৈ যোৱা হয় তেওঁৰ কাহিলীপাৰাৰ বাসগৃহলৈ । তাৰপৰা তেওঁৰ নশ্বৰ দেহ অনা হয় জ্যোতি চিত্ৰবনলৈ । জ্যোতি চিত্ৰবনত বিশিষ্ট শিল্পীগৰাকীক অন্তিম শ্ৰদ্ধাঞ্জলি যাতে তেওঁৰ অনেক গুণমুগ্ধই । ইয়াৰ পিছত অন্তিম শয়ণত থকা অপূৰ্ব বেজবৰুৱাৰ পাৰ্থিব শৰীৰ ৰবীন্দ্ৰ ভৱনলৈ নিয়া হয় ।
ৰাজ্য চৰকাৰৰ সাংস্কৃতিক বিভাগৰ ফালৰ পৰা ৰবীন্দ্ৰ ভৱনত শেষ শ্ৰদ্ধাঞ্জলি জনোৱা হয় শিল্পীগৰাকীক । তাৰ পিছত নৱগ্ৰহ শ্মশানত চিতাত উঠি অনন্তধামলৈ যাত্ৰা কৰে শিল্পী অপূৰ্ব বেজবৰুৱাই । নৱগ্ৰহত প্ৰিয় শিল্পীগৰাকীক অন্তিম বিদায় জনাবলৈ মন্ত্ৰী বিমল বৰা, আছুৰ মুখ্য উপদেষ্টা ড৹ সমুজ্জল কুমাৰ ভট্টাচাৰ্য, বিশিষ্ট শিল্পী লোকনাথ গোস্বামী, সংগীতা কাকতি, বিহু সম্ৰাট খগেন গগৈ আদিকে ধৰি ভালেসংখ্যক গুণমুগ্ধ উপস্থিত থাকে ।
উল্লেখযোগ্য যে এইগৰকী বিশিষ্ট শিল্পীলৈ ৰাজ্য চৰকাৰে শেহতীয়াকৈ শিল্পী পেঞ্চন আগবঢ়াইছিল যদিও সেয়া গ্ৰহণ কৰাৰ পূৰ্বেই তেওঁ নিয়তিৰ ওচৰত হাৰ মানিবলগীয়া হ'ল । ৰাজ্য চৰকাৰে ইতিমধ্যে ঘোষণা কৰিছে যে তেওঁ চিকিৎসাধীন হৈ থকা অৱস্থাত হোৱা পৰিয়ালৰ সকলো ব্যয় চৰকাৰৰ ফালৰ পৰা ঘূৰাই দিয়া হ’ব ।
লগতে পঢ়ক : শিল্পী অপূৰ্ব বেজবৰুৱা আৰু নাই
