কামৰূপ মেট্ৰ'পলিটান,৬ জুনঃ শক্তিপীঠ মা কামাখ্যা ধামত ২২ জুনৰ পৰা ২৬ জুনলৈ অনুষ্ঠিত হ'বলগীয়া অম্বুবাচী মেলাকলৈ মহা আয়োজন। ইতিমধ্যে প্ৰায় প্ৰস্তুতি সম্পূৰ্ণ কৰিছে জিলা প্ৰশাসনে । এইবাৰ অম্বুবাচী মেলাৰ উদ্বোধনী অনুষ্ঠানত উপস্থিত থাকিব বলীউডৰ জনপ্ৰিয় কন্ঠশিল্পী কৈলাশ খেৰ । কণ্ঠশিল্পীগৰাকীয়ে অহাৰ বাবে প্ৰতিশ্ৰুতি প্ৰদান কৰিছে বুলি জানিবলৈ দিয়ে জিলা উপায়ুক্ত বিশ্বজিৎ পেগুৱে । ২২ তাৰিখে মহানগৰীৰ ভৰলুমুখ সোণাৰাম খেলপথাৰত অম্বুবাচীৰ উদ্বোধনী অনুষ্ঠান অনুষ্ঠিত হ'ব ।
ইফালে পূৰ্বতকৈ এইবাৰ হ্ৰাস কৰা হৈছে ভক্তৰ শিবিৰ। পাঁচটাৰ তুলনাত চাৰিটা শিবিৰ ঘোষণা কৰিছে জিলা প্ৰশাসনে । ফাঁচীবজাৰ, নাহৰবাৰী, পাণ্ডু, বৰিপাৰাত ভক্তৰ শিবিৰৰ ব্যৱস্থা কৰিছে জিলা প্ৰশাসনে । ভক্তৰ বাবে খোৱা-বোৱাৰ উপৰিও বিনামূলীয়া বাছৰ ব্যৱস্থা থাকিব । কামাখ্যা ৰে'ল ষ্টেচনৰ শিবিৰ আঁতৰাই দিয়াৰ বাবে ফাঁচীবজাৰ পুৰণি জেইল ৰ'ডত ডাঙৰকৈ শিবিৰ পতা হৈছে । তাৰোপৰি পূৰ্বতকৈ এইবাৰ অধিক কটকটীয়া কৰা হ'ব নিৰাপত্তা ব্যৱস্থা । যাৱতীয় ব্যৱস্থাৰ বাবে সকলো বিভাগকে প্ৰয়োজনীয় নিৰ্দেশনা প্ৰদান কৰিছে জিলা প্ৰশাসনে ।
