জালুকবাৰী আৰক্ষীয়ে আটক কৰে মানৱ সৰবৰাহকাৰী

ধুবৰীৰ বগৰিবাৰীৰ পৰা গ্ৰেপ্তাৰ তালুকদাৰ আলী আৰু কুদ্দুছ আলী নামৰ দুই সৰবৰাহকাৰী । জালুকবাৰীত ভাড়াতীয়া হিচাপে বাস কৰা এটা পৰিয়ালৰ মাতৃ, কন্যাসহ তিনিজনক এই দুই সৰবৰাহকাৰীয়ে বিক্ৰী কৰিছিল বহিঃৰাজ্যত ।

জালুকবাৰী, 24 ছেপ্টেম্বৰঃ জালুকবাৰী আৰক্ষীৰ জালত দুই মানৱ সৰবৰাহকাৰী । ধুবৰীৰ বগৰিবাৰীৰ পৰা গ্ৰেপ্তাৰ তালুকদাৰ আলী আৰু কুদ্দুছ আলী নামৰ দুই সৰবৰাহকাৰী । জালুকবাৰীত ভাড়াতীয়া হিচাপে বাস কৰা এটা পৰিয়ালৰ মাতৃ, কন্যাসহ তিনিজনক এই দুই সৰবৰাহকাৰীয়ে বিক্ৰী কৰিছিল বহিঃৰাজ্যত । প্ৰথমে কাম দিয়াৰ প্ৰলোভনেৰে লৈ গৈছিল হাৰিয়ানালৈ আৰু তাৰ পৰায়ে দুষ্টচক্ৰৰ হাতত বিক্ৰী কৰিছিল তিনিগৰাকীকৈ লোকক । বিক্ৰীৰ কেইমাহমান পিছতেই হাৰিয়ানাৰ পৰা পলাই আহিছিল মাতৃ সহ কন্যা । পলাই আহি ভুক্তভোগীয়ে এজাহাৰ দাখিল কৰিছিল জালুকবাৰী আৰক্ষী চকীত ।

উক্ত এজাহাৰৰ ভিত্তিত জালুকবাৰী আৰক্ষীয়ে এটা গোচৰ ৰুজু কৰি ধুবুৰীৰ বগৰিবাৰীত অভিযান চলাই আটক কৰে তালুকদাৰ আলী, কুদ্দুছ আলীক । ইফালে নিৰুদ্দিষ্ট এটি শিশু এতিয়াই সৰবৰাহকাৰীৰ কৱলত আছে বুলি জানিব পৰা গৈছে ৷ আনহাতে এই ঘটনাত আৰু বহু লোক জড়িত থকাৰ সন্দেহ আৰক্ষীৰ । ইতিমধ্যেই আটকাধীন দুই সৰবৰাহকাৰীৰ ভাষ্য গ্ৰহণ কৰি এই গেংটো উৎখাত কৰিবলৈ নামি পৰিছে মহানগৰ আৰক্ষী ।উল্লেখযোগ্য যে, বহু সময়ত দেখা যায় যে দুখীয়া পৰিয়ালৰ মহিলা আৰু ল’ৰা-ছোৱালীক বহিঃৰাজ্যত কৰ্ম সংস্থাপন দিয়াৰ প্ৰলোভন দি লৈ যায় আৰু পিছত মানৱ সৰবৰাহকাৰীক বিক্ৰী কৰি দিয়া পৰিলক্ষিত হৈ আহিছে ৷