গুৱাহাটী, 16 মাৰ্চ : মুখ্যমন্ত্ৰী হিমন্ত বিশ্ব শৰ্মা নেতৃত্বাধীন ৰাজ্য চৰকাৰৰ কাৰ্যালয়ৰ প্ৰথমখন পূৰ্ণাংগ ৰাজ্যিক বাজেট বুধবাৰে বিত্তমন্ত্ৰী অজন্তা নেওগে বিধানসভাত দাখিল কৰিলে (Assam Budget 2022)।
বিত্তমন্ত্ৰী অজন্তা নেওগে বিধানসভাত দাখিল কৰা ২০২২-২৩ চনৰ পূৰ্ণাংগ ৰাজ্যিক বাজেট সম্পৰ্কত ই টিভি ভাৰতৰ পৰা গুৱাহাটীৰ কেইগৰাকীমান ব্যৱসায়ীৰ মতামত গ্ৰহণ কৰা হৈছিল । বাজেট সম্পৰ্কত লাখটকীয়া ব্যৱসায়ী সন্থাৰ সাধাৰণ সম্পাদক নেকিব ইমান শইকীয়াই কয় যে, "ক'ভিড মহামাৰীৰ বাবে মানুহৰ আৰ্থিক অৱস্থা একেবাৰে বেয়া হৈছে । বিশেষকৈ কোম্পানীত কাম কৰা ব্যৱসায়ীৰ লগত জড়িত লোকসকল যথেষ্ট ক্ষতিগ্ৰস্ত হৈছে । চৰকাৰে বাজেটত এইখিনি মানুহৰ কথা চিন্তা কৰাৰ প্ৰয়োজন আছিল(businessman reactions on Assam budget 2022) ।"
লগতে তেওঁ কয় যে, আমাৰ ৰাজ্যখন উদ্যোগৰ ক্ষেত্ৰত বহুখিনি পিছ পৰা । অসমত বিশেষ উদ্যোগ নথকাৰ বাবে বেছিভাগ বস্তু আমদানি কৰিবলগীয়া হয় । সেয়ে বাজেটত অসমত নতুন নতুন উদ্যোগ গঢ়ি তোলাৰ ক্ষেত্ৰত গুৰুত্ব দিয়া উচিত । লগতে বাজেটত শিক্ষা, নিয়োগ আৰু দক্ষতা বিকাশত বিশেষ গুৰুত্ব দিয়া উচিত । ইপিনে মহামাৰীৰ বাবে ব্যৱসায় বেয়া হোৱা হেতুকে ব্যৱসায়ৰ ক্ষেত্ৰখনৰ লগত জড়িত অভিভাৱক সকলে নিজৰ সন্তানক পঢ়ুওৱাৰ ক্ষেত্ৰত বহুখিনি অসুবিধা হৈছে । এই ক্ষেত্ৰত চৰকাৰে চিন্তা কৰা অতি প্ৰয়োজন ।
আনহাতে, বাজেট সম্পৰ্কত চানমাৰীৰ ব্যৱসায়ী কংকন দাসে কয় যে, মহামাৰীৰ বাবে ক্ষুদ্ৰ ব্যৱসায়ীসকল অতিকে জুৰুলা হৈছে । সকলো সামগ্ৰীৰ মূল্য বৃদ্ধিয়ে এইসকল লোকৰ অৱস্থা বেছি বেয়া কৰিছে । চৰকাৰে বাজেটত এইসকল ব্যৱসায়ীক সকাহ দিয়াৰ এক ব্যৱস্থা কৰা উচিত । লগতে বস্তুৰ দাম নিয়ন্ত্ৰণ কৰাটো অতিকৈ প্ৰয়োজন । মূল্য বৃদ্ধি নিয়ন্ত্ৰণ কৰিব নোৱাৰিলে এই বাজেট সাধাৰণ ৰাইজৰ বাবে কোনো উপযোগী নহয় ।
লগতে পঢ়ক : এক লাখ নিযুক্তি সন্দৰ্ভত কি আছে বাজেটত ?
