গুৱাহাটী, ১২ ডিচেম্বৰ : শিক্ষাৰ গুণগত মান উন্নীতকৰণৰ বাবে আগন্তুক বৰ্ষত ৰাজ্যখনত অনুষ্ঠিত হ'বলগীয়া গুণােৎসৱৰ বিভিন্ন দিশ পর্যালােচনা কৰাৰ উদ্দেশ্যৰে দেওবাৰে জনতা ভৱনস্থিত মুখ্যমন্ত্ৰীৰ সভাকক্ষত মুখ্যমন্ত্রী ড৹ হিমন্ত বিশ্ব শৰ্মাৰ পৌৰােহিত্যত এক বৈঠক অনুষ্ঠিত হয় । বৈঠকত দুটা পর্যায়ত গুণােৎসৱ আয়ােজন কৰাৰ বাবে সিদ্ধান্ত গ্রহণ কৰা হয় (Gunatsav to be held in two phases in Assam) । ২০২২ চনৰ ৫, ৬ আৰু ৭ এপ্রিলত প্রথম পর্যায় আৰু ২০, ২১ আৰু ২২ এপ্রিলত দ্বিতীয় পর্যায়ত গুণােৎসৱ অনুষ্ঠিত হ'ব ।
ইয়াৰ জৰিয়তে প্রথম শ্রেণীৰ পৰা দশম শ্রেণীলৈ ৰাজ্যখনৰ ৪২,৫১,৫২৪ গৰাকী ছাত্ৰ-ছাত্ৰীক সামৰি লােৱা হ'ব । ৰাজ্যখনৰ চৰকাৰী, প্রদেশীকৃত আৰু চাহ বাগিচা ব্যৱস্থাপনাৰে সামৰি লােৱা ৪৬,২৫১ খন বিদ্যালয়ত গুণােৎসৱ অনুষ্ঠিত হ'ব । বৈঠকত মুখ্যমন্ত্ৰীয়ে ৰাজ্যখনত শিক্ষাৰ গুণগত মান অধিক উন্নীতকৰণৰ বাবে গুণােৎসৱ সফলভাৱে অনুষ্ঠিত কৰাৰ ওপৰত গুৰুত্ব আৰােপ কৰে ছাত্র-ছাত্রীসকলে অর্জন কৰা জ্ঞানৰ সঠিক মূল্যায়নৰ বাবে পৰীক্ষা আৰু মূল্যাংকন পদ্ধতি অধিক শক্তিশালী কৰাৰ বাবে শিক্ষা বিভাগৰ বিষয়াসকলক নির্দেশ দিয়ে ।
বৈঠকত শিক্ষা বিভাগৰ শীর্ষ বিষয়াসকলে গুণােৎসৱৰ বাবে বিভাগে গ্ৰহণ কৰা বিভিন্ন ব্যৱস্থাৰাজীৰ সম্পৰ্কত মুখ্যমন্ত্ৰীক অৱগত কৰে । বৈঠকত শিক্ষা বিভাগৰ উপদেষ্টা ড৹ ননী গােপাল মহন্ত, শিক্ষা বিভাগৰ প্ৰধান সচিব বি কল্যাণ চক্ৰৱৰ্তীকে ধৰি শিক্ষা বিভাগৰ শীর্ষ বিষয়াসকল উপস্থিত আছিল ।
লগতে পঢ়ক: Congress training camp: কংগ্ৰেছৰ আকৌ নতুন প্ৰভাত হ'ব
