গুৱাহাটীঃ কেব বাতিলৰ দাবীত সম্প্ৰতি অগ্নিগৰ্ভা হৈছে অসম । ৰাজ্যৰ বিভিন্ন প্ৰান্তৰ লগতে মহানগৰীতো বৃহস্পতিবাৰে সৃষ্টি হয় উত্তপ্ত পৰিস্থিতিৰ । মহানগৰীৰ জু-ৰোড,জনতা ভৱনৰ সমান্তৰালকৈ মালিগাঁও,জালুকবাৰীতো কেবৰ বিৰুদ্ধে ছাত্ৰ সমাজৰ বিক্ষোভ পৰিলক্ষিত হয় । ৰাজ্যসভাত নাগৰিকত্ব সংশোধনী বিধেয়ক উত্থাপন কৰাৰ পিছতে ক্ষোভৰ জুইত জ্বলিব ধৰে ৰাজ্যখন । ইপিনে গুৱাহাটী বিশ্ববিদ্যালয়ৰ ছাত্ৰ সমাজ ওলাই আহি জালুকবাৰীত পথ অৱৰোধ কৰি প্ৰতিবাদ সাব্যস্ত কৰে ৷ প্ৰতিবাদকাৰী ছাত্ৰ আৰু আৰক্ষীৰ মাজত কেইবাঘন্টা ধৰি চলে বাকযুদ্ধ । ৰাষ্ট্ৰীয় ঘাইপথতে বহি পৰে ক্ষোভিত ছাত্ৰসমাজ ৷ উক্ত প্ৰতিবাদত গুৱাহাটী বিশ্ববিদ্যালয়ৰ লগতে অসম অভিযান্ত্ৰিক মহাবিদ্যালয়,পাণ্ডু মহাবিদ্যালয়,ললিত চন্দ্ৰ ভৰালী মহাবিদ্যালয়কে ধৰি কেইবাখনো শিক্ষানুষ্ঠানৰ ছাত্ৰ-ছাত্ৰী আৰু স্থানীয় ৰাইজে অংশগ্ৰহণ কৰে । আৰক্ষীয়ে বুজনি দিয়াৰ চেষ্টা কৰে যদিও মান্তি নহয় প্ৰতিবাদকাৰী ছাত্ৰ সমাজ । কেব বাতিল নোহোৱা পৰ্যন্ত এই প্ৰতিবাদ চলি যাব বুলি হুংকাৰ দিয়ে প্ৰতিবাদকাৰীসকলে । ইফালে মালিগাঁও ৪নং গেট অৱৰোধ কৰে ললিত চন্দ্ৰ ভৰালী মহাবিদ্যালয়ৰ একাংশ ছাত্ৰ-ছাত্ৰীয়ে ৷ প্ৰতিবাদী কাৰ্যসূচীটোত অংশগ্ৰহণ কৰে যুৱ প্ৰজন্মৰ হাৰ্টথ্ৰ’ব জুবিন গাৰ্গে ৷ শিল্পীগৰাকীয়ে উপস্থিত সকলোকে শান্তি-শৃংখলা বজাই ৰাখি গণতান্ত্ৰিকভাৱে প্ৰতিবাদ কৰিবলৈ আহ্বান জনায় ৷
লগতে চাওকঃ'কেব আমি নামানো' ধ্বনিৰে উত্তাল ৰাজ্য
