গুৱাহাটী, 24 নৱেম্বৰ : শাসনভাৰ চমজি লোৱা এটা বছৰ নৌহওতেই ভাবিব নোৱাৰা ধৰণে বিত্তীয় সংকটত পৰা মুখ্যমন্ত্ৰী ড৹ হিমন্ত বিশ্ব শৰ্মা (CM Himanta Biswa Sarma) নেতৃত্বাধীন চৰকাৰৰ বাবে এটা সুখবৰ । অন্ততঃ সাময়িকভাৱে হ’লেও বিত্তীয় সংকটৰ পৰা কিছু পৰিমাণে চৰকাৰখনক মুক্তি দিব পাৰিব এই ভাল খবৰটোৱে ।
কিয়নো কেন্দ্ৰীয় চৰকাৰে মঙলবাৰে কৰৰ অংশ হিচাপে অসম চৰকাৰ (Assam Govt) লৈ মোকলাই দিছে প্ৰায় তিনি হাজাৰ কোটি টকা (GOI Releases three thousand crore to Assam Govt) । সৰ্বমুঠ 2,974.16 কোটি টকা কেন্দ্ৰীয় চৰকাৰে কৰৰ অংশস্বৰূপে মোকলাই দিছে ৰাজ্য চৰকাৰলৈ ৷ দুই এদিনতে এই ধন ৰাজ্যৰ ৰাজকোষত সোমাব ।
বিগত 15 নৱেম্বৰত ৰাজ্যসমূহৰ মুখ্যমন্ত্ৰীসকলৰ সৈতে এক বৈঠকত মিলিত হৈছিল কেন্দ্ৰীয় চৰকাৰ । উক্ত বৈঠকতে মূলতঃ কেন্দ্ৰীয় কৰৰ অংশ মোকলাই দিয়া বিষয়টো বিশেষভাৱে আলোচিত হৈছিল । উক্ত বৈঠকৰ পাচতে মঙলবাৰে কেন্দ্ৰই অসমকে ধৰি দেশৰ 28 খন ৰাজ্যৰ বাবে কৰৰ অংশ হিচাপে সৰ্বমুঠ 95,082 কোটি টকা মোকলাই দিয়ে ।
আচলতে কৰৰ অংশ ৰাজ্যসমূহক মাহে মাহে কেন্দ্ৰই মোকলাই দিব লাগে । কিন্তু কৰ’ণাসৃষ্ট পৰিস্থিতিৰ বাবে বিগত দুটা মাহৰ ধন কেন্দ্ৰই কোনো এখন ৰাজ্যকে মোকলাই দিয়া নাছিল । সেয়েহে মঙলবাৰে একেলগে দুমাহৰ কিস্তি ৰাজ্যসমূহক মোকলাই দিছে কেন্দ্ৰই । মূলতঃ ৰাজ্যৰ আন্তঃগাঁঠনি উন্নয়নত ব্যয় কৰা হ’ব এই ধন ৷
লগতে পঢ়ক : বঙাইগাঁৱত অনুষ্ঠিত হৈছে অসম চৰকাৰৰ কেবিনেট বৈঠক
