গুৱাহাটী, 17 জুনঃ ৰাষ্ট্ৰীয় নাগৰিকপঞ্জীৰ চূড়ান্ত তালিকা প্ৰকাশ পাবলৈ মাজত মাত্ৰ কেইটামান দিন । এনে সময়তে ৰাজ্যৰ গৃহ বিভাগে গ্ৰহণ কৰিছে এক গুৰুত্বপূৰ্ণ সিদ্ধান্ত । খুব ততাতৈয়াকৈ ৰাজ্যত আৰু দহটা নতুন ডিটেনচন কেম্প স্থাপনৰ বাবে সিদ্ধান্ত গ্ৰহণ কৰিছে ৰাজ্য চৰকাৰে । চৰকাৰৰ এই সিদ্ধান্ত ৰাজহুৱা হ'লে যাতে কোনো পক্ষৰ মাজত উত্তেজনা বা অশান্তিকৰ এক বাতাবৰণ সৃষ্টি হ’ব নোৱাৰে তাৰ প্ৰতি লক্ষ্য ৰাখি খুব সন্তৰ্পনে আগবঢ়োৱা হৈছে এই প্ৰক্ৰিয়া ।
স্মৰ্তব্য যে ৰাজ্যত বৰ্তমানে আছে ছটাকৈ ডিটেনচন কেম্প আৰু এই কেম্প কেইটাত বন্দী হৈ আছে প্ৰায় ন শতাধিক লোক, যিসকলক ইতিমধ্যে বিদেশী বুলি চিনাক্ত কৰা হৈছে । কিন্তু নাগৰিকপঞ্জী প্ৰকাশ পোৱাৰ সময় যিহেতু ওচৰ চাপি আহিছে আৰু ইয়াৰ প্ৰকাশৰ লগে লগে আৰু বৃহৎসংখ্যক লোক যে বিদেশী বুলি নিশ্চিত হ’ব সেই কথা প্ৰায় পৰিস্কাৰ হৈ পৰিছে । সেয়েহে ৰাজ্য চৰকাৰে খুব তৎপৰতাৰে আৰু দহটা নতুন কেম্প স্থাপনৰ বাবে সাজু হৈছে ।
আনহাতে, প্ৰায় চাৰে চাৰি কোটি টকা ব্যয়ৰে গোৱালপাৰাত ৰাজ্য চৰকাৰে আন এটা বৃহৎ ডিটেনচন কেম্প নিৰ্মাণৰ প্ৰক্ৰিয়া অব্যাহত ৰাখিছে । কেন্দ্ৰীয় চৰকাৰৰ অনুমোদন সাপেক্ষেই নিৰ্মাণ কৰি থকা হৈছে এই কেম্পটো । এই কেম্পটোত একেলগে তিনি হাজাৰ বন্দী ৰাখিব পৰাৰ ব্যৱস্থা কৰা হৈছে । কিন্তু নাগৰিকপঞ্জীৰ চূড়ান্ত তালিকা প্ৰকাশৰ পূৰ্বে যে এই কেম্পটো সম্পূৰ্ণ হৈ উঠিব তাৰ সম্ভাৱনা খুবেই কম ।
