গুৱাহাটী, 28 ডিচেম্বৰ: চাকৰি দিয়াৰ নামত ধন আত্মসাৎ কৰি গ্ৰেপ্তাৰ এজন অভিযুক্ত ৷ ৰে'ল বিভাগত চাকৰি দিয়াৰ চলেৰে বহু লক্ষাধিক টকা আত্মসাৎ কৰাৰ অভিযোগত, পাঞ্জাবাৰীৰ উত্তম দে (39) নামৰ লোকজনক আজি সাতগাঁও আৰক্ষীয়ে গ্ৰেপ্তাৰ কৰে ৷ 2018 বৰ্ষৰ চেপ্তেম্বৰ মাহৰ পৰাই পশ্চিম বংগৰ বৰশিমলুৰ বাসিন্দা আব্দুল আজিজ নামৰ লোক এজনৰ পৰা, নিজকে সেই সময়ৰ ৰে'ল বিভাগৰ ৰাজ্যিক মন্ত্ৰী ৰাজেন গোহাঁইৰ ধনিষ্ঠ বুলি ভুৱা পৰিচয়েৰে, প্ৰায় তিনি লাখ টকা ধন আত্মসাৎ কৰে ৷ এবছৰ উকলি যোৱা সত্বেও চাকৰি নোহোৱাত উপায়ন্তৰ হৈ ভুক্তভোগী লোকজনে সাতগাঁও আৰক্ষী চকীত এখন এজাহাৰ দাখিল কৰে ৷
উল্লেখ্য যে, আব্দুল আজিজ নামৰ লোকজনে জানিবলৈ দিয়া মতে, তেওঁৰ গাঁৱৰে আন প্ৰায় 10 গৰাকীমান যুৱকৰ পৰাও উত্তম দে নামৰ লোকজনে সৰ্বমুঠ 41 লাখ টকা সংগ্ৰহ কৰিছিল ৷ ইতিমধ্যে সাতগাঁও আৰক্ষীয়ে, আটকাধীন লোকজনৰ বিৰুদ্ধে ভাৰতীয় দণ্ডবিধি 120B/419/420/406 ধাৰাৰ অধীনত 354/19 নম্বৰত এটা গোচৰ ৰুজু কৰি তদন্ত অব্যাহত ৰাখিছে ৷
লগতে পঢ়ক: বিধ্বংসী কাৰ বোমা বিস্ফোৰণত নিহত 76 জনকৈ লোক
