গুৱাহাটী, ১৩ মে' : এফালে মহামাৰী কৰ'ণাৰ ৰুদ্ৰমূৰ্তি আৰু আনফালে সমাগত বাৰিষা । যোৱাটো বানত ৰাজ্যত সৰ্বমুঠ ৩৮ টা মথাউৰি ক্ষতিগ্ৰস্ত হৈছিল । তাৰে ৩২ টাৰ পুনৰ মেৰামতি ইতিমধ্যে সম্পূৰ্ণ হৈছে যদিও লক্ ডাউনৰ পৰিপ্ৰেক্ষিতত মেৰামতিৰ কাম সম্পূৰ্ণ হৈ নুঠিল ছটা মথাউৰিৰ । ইটিভি ভাৰতৰ আগত এই কথা প্ৰকাশ কৰিছে ৰাজ্যৰ জলসম্পদ মন্ত্ৰী কেশৱ মহন্তই ।
৩১ মে'ৰ ভিতৰত এই ছটা মথাউৰিৰ মেৰামতি সম্পূৰ্ণ কৰি তোলাৰ বাবে যুদ্ধকালীন তৎপৰতাৰে কাম কৰি থকা হৈছে বুলিও তেওঁ মন্তব্য কৰে । এই ছটা মথাউৰি হ'ল কৰিমগঞ্জ জিলাৰ চিংলা নৈৰ দুটা, যোৰহাট আৰু গোলাঘাট জিলাৰ চৰাইপানী নদীৰ দুটা, শোণিতপুৰ জিলাৰ ব্ৰহ্মজান নদীৰ এটা আৰু নগাঁও জিলাৰ এটা ৰিং বান্ধ ।
স্মৰ্তব্য যে, আগন্তুক বাৰিষাৰ সৈতে মোকাবিলা কৰিবলৈ জলসম্পদকে ধৰি অন্যান্য বিভাগসমূহ কেনেদৰে সাজু হৈছে সেই বিষয়ে মুখ্য সচিব কুমাৰ সঞ্জয় কৃষ্ণই এক পৰ্যালোচনা বৈঠকতো বুজ লয় । ১ মে'ৰ পৰা ৰাজ্যৰ প্ৰতিটো সংমণ্ডলত স্থাপন কৰা হৈছে নিয়ন্ত্ৰণ কক্ষও । ৰাজ্য চৰকাৰে বান পৰিস্থিতিৰ সৈতে মোকাবিলা কৰিবলৈ কেন্দ্ৰৰ পৰা মূলতঃ তিনিটা শিতানত পুঁজি লাভ কৰি আহিছে । এই তিনিটা শিতান হ'ল- এন এল চি পি আৰ, এফ এম পি আৰু উত্তৰ-পূৱ পৰিষদ ।
এই তিনিওটা শিতানৰ পৰা ২০১৯-২০ বৰ্ষত অসমে ৭৮.১৩ কোটি টকা লাভ কৰিছে । আনহাতে, একে শিতানতে ২০১৮-১৯ ত ১৪৩.০৩ কোটি, ২০১৭-১৮ ত ২৪৬.৩৫ কোটি আৰু ২০১৬-১৭ ত ১.৭৯ কোটি টকা অসমে লাভ কৰিছিল । ইয়াৰ ওপৰিঞ্চি এছ ডি আৰ এফৰ পৰা জলসম্পদ বিভাগে ২০১৯-২০ বৰ্ষত ১০১ খন আঁচনিৰ বিপৰীতে ১৫৩.৯১ কোটি, ২০১৮-১৯ ত ১৬০ খন আঁচনিৰ বিপৰীতে ২৫০ কোটি, ২০১৭-১৮ ত ২০৪ খন আঁচনিৰ বিপৰীতে ৩৭০.৪২ কোটি আৰু ২০১৬-১৭ বৰ্ষত ১৬৬ খন আঁচনিৰ বিপৰীতে ৩৪৪.২০ কোটি টকা লাভ কৰিছিল ।
আনহাতে, ড'নাৰ মন্ত্ৰণালয়ৰ পৰাও শেহতীয়াকৈ দুখন আঁচনিৰ বিপৰীতে ৪৮.৭৫ কোটি অসমে লাভ কৰিছে । কিন্তু মনকৰিবলগীয়া বিষয়টো হ'ল অসমৰ বানপ্ৰৱণ এলেকাৰ ৫০ শতাংশহে এই পৰ্যন্ত চৰকাৰে সামৰি ল'বলৈ সক্ষম হৈছে । ভৰ বাৰিষা অহাৰ পূৰ্বে অটাইকেইটা মথাউৰিৰ কাম সম্পূৰ্ণ হয় নে নহয় সেইয়া লক্ষণীয় হ'ব ৷
লগতে পঢ়ক : ৩০ দিনৰ ভিতৰত দেশত প্ৰায় 5.50 লাখ লোক আক্ৰান্ত হ’ব কৰ’ণাত !
