গুৱাহাটী,18 এপ্ৰিলঃ সম্প্ৰতি সমগ্ৰ বিশ্বতে ত্ৰাস চলোৱা কৰ’ণা মহামাৰীয়ে বিশ্ব অৰ্থনীতিৰ লগতে ভাৰতৰ অৰ্থনৈতিক পৰিকাঠামোতো যথেষ্ট প্ৰভাৱ পেলাইছে ৷ অসমো ইয়াৰ ব্যতিক্ৰম নহয়। কেন্দ্ৰীয় তথা ৰাজ্যিক চৰকাৰৰ নিজ আয়ৰ সকলো বিলাক পথ বন্ধ হৈ পৰিছে । এই সন্দৰ্ভত ই টিভি ভাৰতৰ সাংবাদিকৰ আগত সাম্প্ৰতিক অৰ্থনৈতিক পৰিস্থিতিৰ বিষয়ে বিস্তৃত মন্তব্য কৰে বিশিষ্ট অৰ্থনীতিবিদ ডঃ মাধুৰ্য প্ৰসাদ বেজবৰুৱাই ৷
অৰ্থনীতিবিদ গৰাকীয়ে কয় যে,সুদীৰ্ঘ সময়ৰ লক ডাউনে দেশৰ অৰ্থনীতিত সাংঘাটিক ধৰণে প্ৰভাৱ পৰিছে ৷ ইয়াৰ ফলত হ’ব পৰা ক্ষতি পূৰাবলৈ প্ৰয়োজন হ'ব দীঘলীয়া সময়ৰ । লক ডাউনৰ পিছৰ পৰিস্থিতি চম্ভালিবলৈ এতিয়াৰে পৰা যদি চৰকাৰে ব্যয় সংকোচনৰ কেতবোৰ পদক্ষেপ গ্ৰহণ কৰে তেতিয়া কিছু পৰিমাণে সকাহ লাভ কৰিব পৰা যাব ৷ প্ৰয়োজন সাপেক্ষে চৰকাৰী কৰ্মচাৰীৰ দৰমহা কৰ্তন কৰি হ'লেও এই পৰিস্থিতিৰ মোকাবিলা কৰিব লাগিব ৷
লক ডাউন শেষ হোৱাৰ পিছত সমগ্ৰ বিশ্ববাসীৰ লগতে আমিও এখন নতুন পৃথিৱীত ভৰি দিম । যিখন পৃথিৱী হ’ব অত্যন্ত ভয়ংকৰ আৰু কদৰ্য। সেইখন পৃথিৱীত তিষ্ঠি থাকিবলৈ আমি সকলোৱে আন এখন যুঁজত অৱতীৰ্ণ হ’ব লাগিব । সেইখন যুঁজৰ বাবে আমি সাজু হোৱা প্ৰয়োজন বুলিও মন্তব্য কৰে অৰ্থনীতিবিদ ড৹ মাধুৰ্য প্ৰসাদ বেজবৰুৱাই ৷
