গুৱাহাটী,১ জানুৱাৰী : নতুন আশা, প্ৰত্যাশা, সংকল্প লৈ ইংৰাজী নতুন বছৰক আদৰিলে বিশ্ববাসীয়ে । বিদায়ী বছৰটোৰ সকলো দুখ- দুৰ্দশা, অপায় অমংগল নাশ হোৱাৰ লগতে নতুন বছৰটো মংগলময় হোৱাৰ কামনা কৰি পুৱাৰেই পৰা মঠ-মন্দিৰ, উপাসনাস্থলীৰ উপৰিও বিনোদনথলীত ভিৰ দেখিবলৈ পোৱা গ'ল (Devotees throng places of worship in Guwahati)। আনন্দ উল্লাসৰ মাজেৰে নৱবৰ্ষৰ প্ৰথম দিনটো অতিবাহিত কৰে সকলোৱে ।
মহানগৰবাসীৰ লগতে ৰাজ্যৰ বিভিন্ন প্ৰান্তৰ পৰা অহা বহু লোকে মহানগৰীৰ বিনোদনথলীসমূহত ভিৰ কৰে । পুৱাৰে পৰা লতাশিলৰ গণেশ মন্দিৰ, গণেশগুৰিৰ গণেশ মন্দিৰ, উগ্ৰতাৰা দেৱালয়, কামাখ্যা, বশিষ্ঠ মন্দিৰ, শুক্ৰেশ্বৰ মন্দিৰ, লাচিত নগৰৰ হনুমান মন্দিৰ, উমানন্দ মন্দিৰকে ধৰি ধৰ্মীয় স্থানসমূহত ৰাইজে আশীষ বিচাৰি ভিৰ কৰে । উগ্ৰতাৰা দেৱালয় আৰু লতাশিল গণেশ মন্দিৰ কৰ্তৃপক্ষই জনোৱা মতে, বছৰৰ পহিলা দিনটোতে পুৱাৰে পৰা ভক্তৰ যথেষ্ট ভিৰ হয় ।
নতুন বছৰটো যাতে সকলোৰে বাবে সুখ আৰু আনন্দৰে পাৰ হয় তাৰে কামনা কৰিছে সকলোৱে । কৰ'ণা মহামাৰীৰ পৰা সকলোৱে যাতে পৰিত্ৰাণ পায় তাৰ বাবেও ভগৱানৰ ওচৰত প্ৰাৰ্থনা কৰিছে সকলোৱে । ঠায়ে ঠায়ে ভক্তসকলৰ বাবে ভোগৰ ব্যৱস্থা কৰা হৈছে ।
সমান্তৰালকৈ গুৱাহাটীৰ বাকী উপাসনা স্থানবোৰতো পুৱাৰে পৰা ভক্তৰ ভিৰ দেখা যায় । আনহাতে চিৰিয়াখানা, শ্ৰদ্ধাঞ্জলি কানন, শ্ৰীমন্ত শংকৰদেৱ কলাক্ষেত্ৰকে ধৰি গুৱাহাটীৰ বিনোদনৰ স্থানসমূহতো পুৱাৰে পৰা বহুলোকৰ ভিৰ দেখিবলৈ পোৱা যায় ।
লগতে পঢ়ক :বছৰৰ অন্তিমটো দিনত শোণিতপুৰ জিলা পৰিবহণ বিভাগে লাভ কৰিলে বিশেষ সফলতা
