গুৱাহাটী, 29 আগষ্ট: OLX ত বস্তু বিক্ৰী অথবা ক্ৰয় কৰোঁতে এতিয়াৰে পৰা সাৱধান হওক । অন্যথা আপোনাৰ অলপ অসাৱধানতাৰ বাবে আপুনি পৰিব পাৰে বিপদত । কিয়নো চাইবাৰ(cyber crime) অপৰাধীৰ নজৰ আছে আপোনাৰ ওপৰত ।
আপুনি OLX ত বিজ্ঞাপন দিয়া সামগ্ৰী ক্ৰয় কৰাৰ চলেৰে আপোনাৰ সৈতে চিনাকি হৈ আপোনাৰ বেংক একাউন্ট হেক কৰি লুটিব পাৰে একাউন্টৰ জমা ধন ৷ অসম আৰক্ষীৰ চাইবাৰ চেলক প্ৰত্যাহ্বান জনাই ইতিমধ্যে চাইবাৰ অপৰাধীয়ে বিগত সময়চোৱাত সংঘটিত কৰি আহিছে বিভিন্ন ধৰণৰ অপৰাধ মূলক ঘটনা ৷
চাইবাৰ অপৰাধীৰ কৱলত পৰি সর্বস্বান্ত হোৱা বহু লোকে আৰক্ষীৰ কাষ চপাৰ পিছতো সুফল লাভ কৰা নাই ৷ শেহতীয়াকৈ ৰাজ্যৰ ৰাজধানী গুৱাহাটীত পোহৰলৈ আহিছে চাইবাৰ অপৰাধৰ লগত জড়িত তেনে এক ঘটনা ৷ চাইবাৰ অপৰাধীৰ জালত পৰিছে এজন কটন কলেজৰ ছাত্ৰ ।
লগতে পঢ়ক: জনী আলীৰ ঘৰত ওপজা দিনৰ পাৰ্টীত কেক্, প্ৰীতিভোজৰ ঠাই ল’লে ড্ৰাগছে
মহানগৰীৰ নিউ গুৱাহাটী, পৰাগ দাস পথৰ বাসিন্দা ছাত্ৰজনৰ নাম হৈছে আকাশ নাথ । জানিব পৰা মতে ছাত্ৰজনে যোৱা ২৫ আগষ্টত নিজৰ Desktop টো বিক্ৰীৰ বাবে OLX ত এটা বিজ্ঞাপন দিছিল । কিন্তু বিজ্ঞাপন দিয়াৰ পিছত এজন ব্যক্তিয়ে তেওঁৰ লগত যোগাযোগ কৰে ।
পৰৱৰ্তী সময়ত অতি কৌশলপূৰ্ণ ভাৱে ছাত্ৰ জনৰ লগত অনলাইনত যোগাযোগ কৰি সামগ্ৰীটো ক্ৰয় কৰাৰ প্ৰতিশ্ৰুতি দিয়ে ৷ গ্ৰাহক ৰূপী চাইবাৰ অপৰাধীজনে ছাত্ৰ জনৰ পৰা Google Pay ৰ নম্বৰ লৈ বেংক একাউন্ট হেক কৰি লুটি লৈ যায় 22 হাজাৰ টকা ।
লগতে পঢ়ক: অসমত আৰম্ভ হ'ল ভিষ্টাড'ম ৰে’ল সেৱা
পিছত এই কথা জানিব পাৰি হতভম্ব হৈ পৰে ছাত্ৰজন । ভুক্তভোগী ছাত্ৰজনে পৰিয়ালক কিদৰে চাইবাৰ অপৰাধীযে জালত পেলাই বেংকৰ জমা ধন লুটি নিলে সেই কথা অৱগত কৰে । এফালে এই ঘটনা সন্দৰ্ভত ভুক্তভোগী ছাত্ৰজনৰ মাতৃ জিলমিল দাসে ইতিমধ্যে গীতানগৰ আৰক্ষী থানাত দাখিল কৰিছে এজাহাৰ ।
উল্লেখ্য যে, আৰক্ষীয়ে ছাত্ৰজনৰ সৈতে যোগাযোগ কৰা নম্বৰৰ ভিত্তিত চাইবাৰ অপৰাধীৰ সন্ধানত অভিযান অব্যাহত ৰাখিছে বুলি জানিব পৰা গৈছে ।
লগতে পঢ়ক: ডিব্ৰুগড়ত উত্তৰ-পূৱৰ দ্বিতীয়টো গোটা আৱৰ্জনা ব্যৱস্থাপনা প্ৰকল্প মুকলি
