গুৱাহাটী, ১৯ মে': মুখ্যমন্ত্ৰী ড৹ হিমন্ত বিশ্ব শৰ্মাই বুধবাৰে জনতা ভৱনত আয়োজন কৰা এক বৈঠকত ৰাজহ আৰু দুৰ্যোগ ব্যৱস্থাপনা বিভাগৰ কাম-কাজৰ পৰ্যালোচনা কৰি আগন্তুক বাৰিষা কালৰ বাবে বিভাগে লোৱা প্ৰস্তুতিৰ বিতং বুজ লয় । মুখ্যমন্ত্ৰীয়ে বান নিয়ন্ত্ৰণ সম্বন্ধীয় কেতবোৰ নিৰ্দেশনা প্ৰদান কৰে ।
বানপীড়িত লোকসকলক তৎকালীনভাৱে সকলোধৰণৰ সাহাৰ্য সামগ্ৰী প্ৰদান কৰাৰ বাবে উপায়ুক্তসকলৰ পৰ্যাপ্ত সু-ব্যৱস্থা থাকিব লাগিব বুলি মুখ্যমন্ত্ৰীয়ে সদৰি কৰে । আনহাতে, আশ্ৰয় শিবিৰৰ আবাসীসকলকে ধৰি সকলো ক্ষতিগ্ৰস্ত লোককে হিতাধিকাৰীৰ তালিকাত অন্তৰ্ভুক্ত কৰিব পৰাকৈ আশ্ৰয় শিবিৰৰ সংজ্ঞা বহলোৱাৰ ক্ষেত্ৰত মুখ্যমন্ত্ৰীয়ে গুৰুত্ব আৰোপ কৰে ।
বানপানীৰ ক্ষয়-ক্ষতিৰ মূল্যায়ন আৰু ক্ষতিপূৰণ সম্বন্ধীয় সকলো কাম চক্ৰ বিষয়াক নডেল বিষয়া হিচাপে লৈ ছিংগল উইণ্ডো ব্যৱস্থাৰ জৰিয়তে কৰাৰ নিৰ্দেশ দিয়ে । আনহাতে, দুটাতকৈ অধিক বিত্তীয় বৰ্ষ অতিক্ৰম কৰা এছ ডি আৰ এফৰ অধীনৰ সকলো জৰুৰী প্ৰকল্পৰ কাম বন্ধ কৰি আবণ্টিত ঠিকাসমূহ বাতিল কৰাৰ নিৰ্দেশ দিয়ে মুখ্যমন্ত্ৰীয়ে ।
এতিয়াৰ পৰা প্ৰতি বছৰৰ ৩১ মাৰ্চৰ ভিতৰতে এনে প্ৰকল্পবোৰৰ কাম সম্পূৰ্ণ কৰাৰ বাবে স্থায়ী নিৰ্দেশনা জাৰি কৰাৰ নিৰ্দেশ দিয়ে মুখ্যমন্ত্ৰী শৰ্মাই । বৈঠকত বিভাগীয় মন্ত্ৰী যোগেন মহন, মুখ্যমন্ত্ৰীৰ প্ৰধান সচিব সমীৰ কুমাৰ সিনহাকে ধৰি বিভাগীয় শীৰ্ষ বিষয়াসকল উপস্থিত আছিল ।
লগতে পঢ়ক : কলিয়াবৰত ধোঁৱাচাঙত প্ৰশাসনৰ নীতি-নিৰ্দেশনা
